नेपालविरुद्ध किर्गिस्तान यु २३: पहिलो हाफ गोलरहित बराबरी

काठमाडौं । फिनिसिङमा चुक्दा नेपाली राष्ट्रिय फुटबल टोली थ्री नेसन्स कपको आफ्नो पहिलो खेलमा किर्गिस्तान यु २३ सँग पहिलो हाफसम्म गोलरहित बराबरी खेलेको छ ।

करिब ६ वर्षपछि दशरथ रंगशालामा पहिलो खेल खेलिरहेको नेपाली सिनियर टोलीले गोलका लागि केही अवसर सिर्जना गरे पनि सदुपयोग गर्न सकेन ।

खेलको तेस्रो मिनेटमा अञ्जन विष्टले १८ यार्ड बक्स बाहिरबाट गरेको प्रहार फ्रेममा परेको थिएन । भ्रमणकारी किर्गिस्तान यु २३ माथि हाबी बनेको नेपालका लागि तेज तामाङको क्रसमा चौथो मिनेटमा अञ्जनले हेडरमार्फत गरेको प्रहार पनि बाहिरिएको थियो ।

अग्रताका लागि निरन्तर प्रयासरत नेपालका लागि १०औं मिनेटमा डेब्युटेन्ट त्रिदेव गुरुङको कर्नरमा डिफेन्डर अनन्त तामाङले ६ यार्ड बक्स नजिकबाट हेडरमार्फत गरेको प्रहार पनि आउट हुँदा घरेलु टोली दुर्भाग्यशाली साबित भयो ।

त्यसको चार मिनेट नबित्दै अञ्जनको क्रसमा किर्गिस्तानका कप्तान ताशेभ कामोलिदिनले बचाउन खोज्दा बल पोलमा लागेर फर्केको थियो ।

मंगलबारदेखि सुरु भएको प्रतियोगितामा आयोजक नेपालको यो पहिलो खेल हो ।