स्वास्थ्य मन्त्रालयले भन्योः मर्निङ वाक नगर्नूस, सवारीसाधन सकभर नचलाउनूस्

काठमाडौं । विभिन्न जिल्लामा लागेको डढेलोका कारण काठमाडौं उपत्यकामा चरम प्रदुषण फैलिएपछि जनस्वास्थ्य जोखिममा परेको छ । स्वास्थ्य तथा जनसंख्या मन्त्रालयले एक विज्ञप्ति जारी गरी सचेतता अपनाउन आग्रह गरेको छ ।

मन्त्रालयका सहप्रवक्ता डा. समिरकुमार अधिकारीले विज्ञप्ति जारी गरी यस प्रदूषणबाट श्वासप्रश्वास लगायत विभिन्न समस्या उत्पन्न हुन सक्ने जनाएका छन् । प्रदूषणको प्रभावलाई रोकथाम गर्न उनले चार बुँदे निर्देशन पनि दिएका छन् ।

घरबाहिर खुल्ला स्थानमा नबस्न, मर्निङवाक नगर्न र घरबाहिर गएर शारीरिक व्यायाम नगर्न विज्ञप्तिमा भनिएको छ । ‘बालबालिका, दीर्घ रोगी, ज्येष्ठ नागरिकको विशेष ख्याल गरौं,’ मन्त्रालयले भनेको छ ।

यसैगरी फोहोरको उचित व्यवस्थापन गर्न तर फोहोर जलाउने काम नगर्न मन्त्रालयले सल्लाह दिएको छ । घरबाहिर सकभर ननिस्कन र निस्कनै परेमा मास्कको अनिवार्य प्रयोग गर्न तथा कोभिड १९ का मापदण्ड पालना गर्न विज्ञप्तिमा भनिएको छ ।

धुलो धुँवा उड्ने खालका पेशा, व्यवसाय र निर्माण कार्य केही दिनलाई स्थगन गर्न पनि मन्त्रालयले आग्रह गरेको छ । अत्यावश्यक काम नभइ सवारीसाधन नचलाउन पनि भनिएको छ ।