जलवायु परिवर्तनबारे छलफल गर्न बाइडेनद्वारा ४० देशका सरकार प्रमुखलाई निम्तो

वासिङ्टन । अमेरिकी राष्ट्रपति जो बाइडेनले जलवायु परिवर्तनको चुनौतिविरुद्ध एकजुट हुनेबारे छलफल गर्न चीन र रुससहित ४० मुलुकका राष्ट्र एवं सरकार प्रमुखलाई निम्तो दिएको छन् ।

ह्वाइट हाउसद्वारा शनिबार जारी वक्तव्यमा अप्रिल २२-२३ मा भर्चुअल माध्यमबाट उक्त छलफल हुने जनाइएको छ । दुई दिने छलफललाई सर्वसाधारणले पनि हेर्न मिल्ने गरि प्रत्यक्ष प्रसारण गरिने भएको छ ।

‘यो छलफल आगामी नोभेम्बरमा ग्लास्गोमा आयोजना हुने राष्ट्रसंघीय जलवायु परिवर्तन सम्मेलनका लागि महत्वपूर्ण कोशेढुंगा हुनेछ’ ह्वाइट हाउसद्वारा जारी वक्तव्यमा उल्लेख छ ।

वार्तामा चिनियाँ राष्ट्रपति सी जिङपिङ, रुसी राष्ट्रपति भ्लादमिर पुटिन, भारतीय प्रधानमन्त्री नरेन्द्र मोदी, जापानी प्रधानमन्त्री यासिहिदे सुगा, ब्राजिली राष्ट्रपति जैर बोल्सेनारो, क्यानडेली प्रधानमन्त्री जस्टिन टु्रडो, इजरायली प्रधानमन्त्री बेन्जामिन नेतान्याहु, साउदी अरेबियाका राजा सलमान र बेलायती प्रधानमन्त्री बोरिस जोन्सन छन् ।

बंगालदेशी प्रधानमन्त्री शेख हसिना वाजेद र भुटानी प्रधानमन्त्री लोते छिरिङलाई पनि छलफलमा सहभागि हुँदैछन् । यो छलफल विश्व तापक्रमलाई १.५ डिग्री सेल्सियसमा सीमित राख्नेबारे हुने कोप-२६ सम्मेलनका लागि महत्वपूर्ण हुने जनाइएको छ ।