एएफसी कप तयारीस्वरुप आर्मीले किर्गिस्तान-२३ सँग अभ्यास खेल खेल्दै

काठमाडौं । पहिलोपल्ट एएफसी कप खेल्न लागेको त्रिभुवन आर्मी क्लबले आज थ्री नेशन्स कपका लागि नेपाल भ्रमणमा रहेको किगिस्तान यू–२३ टिमसँग अभ्यास खेल खेल्दैछ ।

आर्मी र किर्गिस्तान टोलीबीचको खेल दशरथ रंगशालामा आज दिउँसो साढे ३ बजेदेखि हुनेछ । यो खेल हेर्न दर्शकका लागि प्रवेश निःशुल्क गरिएको छ ।

यसै वर्ष एएफसी क्लब लाइसेन्स पाएको आर्मीले पहिलोपल्ट एएफसी कप खेल्न लागेको हो । अघिल्लो वर्षको शहिद स्मारक ए डिभिजन लिगको च्याम्पियन मछिन्द्र क्लबले एएफसी क्लब लाइसेन्स नपाएपछि दोस्रो भएको आर्मीले अवसर पाएको हो ।

आर्मीले चैत २५ गते एएफसी कप समूह चरणको प्ले अफ खेलका रुपमा श्रीलंका पुलिससँग दशरथ रंगशालामा खेल्दैछ ।