होली खेल्दा झुक्किएर एसिड छ्यापियो, तीन बालबालिका घाइते

काठमाडौं । काठमाडौंको साँखुस्थित शंखरापुर नगरपालिका-  १ चापागाउँमा होली खेल्ने क्रममा एसिड प्रहार हुँदा ३ जना घाइते भएका छन् । साँखुको नविन ग्राम विद्यालयको कम्पाउण्डमा होली खेलिरहेका ३ जनामाथि एसिड प्रहार भएको हो ।

घटनामा १६ वर्षीया अस्मिता तामाङ, ११ वर्षका सविन तामाङ र ९ वर्षीय विशाल तामाङ घाइते भएका छन् । एसिड छ्याप्ने १७ वर्षीय पवन पहारी र आकाश तामाङ रहेको प्रहरीले जनाएको छ । स्कुल कम्पाउण्डभित्र केशव नेपालले सञ्चालन गरेको क्यान्टिनको दूध डेरीमा राखिएको एसिड प्रहार भएको प्रहरी प्रभाग साँखुकी प्रहरी निरीक्षक जानुकादेवी खरेलले नेपाल प्रेसलाई बताइन् ।

उनले भनिन्, ‘हिजो दिउँसो उनीहरु होली खेलिरहेका रहेछन् । त्यहीसँगै डेरीमा राखेको बोतलको एसिडलाई पानी सम्झेर छ्यापेका रहेछन् ।’

डेरीमा एसिड चाहिने भएकाले राखिएको तर त्यसको असुरक्षित तरिकाले राख्दा दुर्घटना भएको छ । खरेलका अनुसार घाइतेहरुलाई साँखुस्थित सुष्मा कोइराला मेमोरियल अस्पताल शंखरापुरमा उपचार भइरहेको छ । घाइते एकजना घर फर्किसकेका छन् ।