थ्री नेसन्स कप फाइनलः मध्यान्तरअघि नेपाललाई २ गोलको अग्रता

काठमाडौं । संजोग राईको एक गोल र एक पासमा नेपालले थ्री नेसन्स कप फाइनलको पहिलो हाफमा बंगलादेशविरुद्ध २-० को अग्रता लिएको छ । बंगलादेशविरुद्ध १८औं मिनेटमा गोल गर्दै संजोगले १८ महिनाको खडेरी तोडेका थिए ।

२०१९ को सेप्टेम्बरपछि नेपालले आठ खेलमा गोल गर्न सकेको थिएन । दशरथ रंगशालामा जारी थ्री नेसन्स कपको फाइनलको १८औं मिनेटमा संजोगले गरेको गोल प्रतियोगिताको ओपन प्लेमा पहिलो गोल हो । नेपाल, बंगलादेश र किर्गिस्तान यु २३ सहभागी भएको प्रतियोगितामा यसअघि एकमात्र गोल आत्मघाति गोल भएको थियो । आज जारी फाइनलमा संजोगले गोल गरेसँगै रंगशालामा ओपन प्लेबाट पहिलो गोल भएको छ ।

त्यस्तै, ४२औं मिनेटमा मिडफिल्डर विशाल राईले गोल गर्दै नेपालको अग्रता दोब्बर पारे । उनले संजोगकै पासमा पेनाल्टी एरिया भित्रबाट बंगलादेशका गोलकिपर अनिसुर रहमानलाई बिट गर्दै गोल गरेका थिए ।