ललितपुरको नख्खुमा बर्डफ्लु संक्रमण पुष्टि

ललितपुर महानगरपालिका-१४, नख्खुमा बर्डफ्लु रोग पुष्टि भएको छ । पशुसेवा विभागका अनुसार गत चैत १३ गते उक्त क्षेत्रमा बर्डफ्लु पुष्टि भएको हो ।

बर्डफ्लु रोगको सघन निगरानी (सर्भिलेन्स)को क्रममा रोग पुष्टि भएको विभागद्वारा जारी वक्तव्यमा उल्लेख छ । त्यहाँका किसानले पालेका कुखुरा, बट्टाई र हाँसबाट संकलन गरिएको नमुनालाई केन्द्रीय अन्वेषण प्रयोगशालामा परिक्षण गर्दा बर्डफ्लु पुष्टि भएको जनाइएको छ ।

रोग फैलने सक्ने सम्भावित क्षेत्रका घरपालुवा पन्छी तथा रोग सार्न सक्ने अन्य वस्तु समेत नष्ट गरिएको जनाइएको छ । ५१६ हाँस, ८५४ स्थानीय कुखुरा, १५४ बट्टाइ, ९४४ गोटा अण्डा र ३३५ किलो दाना नष्ट गरिएको जनाइएको छ ।

रोग देखापरेको क्षेत्रलाई पूर्ण निसंक्रमण गरि नष्ट गरिएको उल्लेख छ । रोगलाई पूर्ण नियन्त्रणमा राख्न जैविक सुरक्षाका विधि अवलम्वन गर्न समेत विभागले आग्रह गरेको छ ।