म्यानमारमा मारिनेको संख्या ५ सय नाघ्यो, ‘असफल राष्ट्र’ बन्नेतर्फ उन्मुख : विश्लेषक

यांगुन । सेनाविरुद्धको प्रदर्शनमा म्यानमारमा चर्किएको प्रदर्शनमा मारिनेको संख्या ५ सय नाघेको छ । अधिकारवादी समूहका अनुसार मंगलबारसम्म मृतक संख्या ५१० पुगेको हो ।

ज्यान गुमाउनेको संख्या बढिरहेपनि सर्वसाधारण सेनाविरुद्ध सडकमा उत्रिएका छन् । राजनीतिक बन्दीहरुको समूह (आप)का अनुसार सोमबार मात्र १४ नागरिक मारिएका छन् ।

शनिबार मात्र १४१ जना मारिएको जनाइएको छ । अमेरिकी राष्ट्रपतिय कार्यालय ह्वाइट हाउसले निहत्था नागरिकमाथिको हिंसाको विरोध गर्दै तत्काल लोकतन्त्र पुनर्वहालीको माग गरेको छ ।

सोमबार मुख्य सहर यांगुनको साउथ ड्यागनमा मात्र ८ जना मारिएका छन् । सुरक्षाकर्मीले प्रदर्शनकारीको अवरोध हटाउन गहं्रगुा क्यालिबर हतियार प्रयोग गरेको जनाइएको छ । जुन्ता र प्रहरीले चाहिँ पछिल्लो हिंसाबारे केही बोलेका छैनन् ।

विश्लेषकले म्यानमार असफल राज्यको संघारमा रहेको बताएका छन् । थिंक ट्यांक संस्था लोए इन्स्टिच्युटका निर्देशक हार्भे लेमायुले म्यानमार असफल राष्ट्र बन्नेतर्फ अघि बढेको बताए । म्यानमार संकट समाधानका लागि प्रमुख शक्तिराष्ट्र एकजुट हुनुपर्ने उनले बताए ।

म्यानमार सेनाले बन्दुकले शासन चलाउँदा त्यहाँको अवस्था जटिल र कठिन भएको उनको भनाई छ ।

हिंसा चर्किँदै जादा हजारौं म्यानमार शरणार्थी छिमेकी मुलुक थाइल्यान्ड र भारततर्फ प्रवेश गरेको अन्तर्राष्ट्रिय संचारमाध्यमले जनाएका छन् । म्यानमारले सेनाले थाइल्यान्डको सीमा नजिक करेन आदिवासी समुदायको इलाकामा हवाइ हमला गर्दा उनीहरु छिमेकी मुलुक भागेको जनाइएको छ ।