नेपालको वायुप्रदूषण भुटानदेखि तिब्बतसम्म फैलियो, थिम्पुमा सतर्क रहन निर्देशन

काठमाडौं । केही दिनयता काठमाडौंसहित देशैभर फैलिएको वायुप्रदूषण भुटानको राजधानी थिम्पु र चीनको तिब्बतसम्म पुगेको छ ।

वातावरण विभागका सूचना अधिकारी शंकरप्रसाद पौडेलले पहिलोपटक नेपालको प्रदूषण हिमाल नाघेर तिब्बतसम्मै पुगेको बताए । तुवाँलो थिम्पु पुगेपछि भुटान सरकारले पनि नागरिकलाई सचेत रहन आग्रह गरेको छ ।

थिम्पुस्थित द भुटनिज अखबारका सम्पादक तेन्जिङ लाम्साङका अनुसार नेपालको बनडढेलोबाट फैलिएको प्रदूषण भुटानको आकाशसम्म पुगेको छ । प्रदूषण सिक्किम हुँदै भुटानसम्म पुगेको हो ।

पाँचदिनयता उपत्यकाको वायुगुणस्तर मापक (एक्यूआइ) खराब देखिएको छ । वातावरणविद् पौडेलका अनुसार म्यान्मारदेखि अफगानिस्तानसम्म फैलिएको हिन्दूकुश हिमालय क्षेत्रमा प्रदूषण बढी देखिन्छ । यो अवस्था केही दिनसम्म नबद्लिने उनले बताए ।