क्वारेन्टाइन आदेश लागू गर्न स्थानीय तहलाई सरकारको परिपत्र

काठमाडौँ । सरकारले क्वारेन्टाइन आदेश, २०७७ लागू गर्न गराउन सबै स्थानीय तहलाई परिपत्र गरेको छ । भारतका विभिन्न राज्यमा कोभिड–१९ को संक्रमण बढिरहेको र नेपालमा पनि त्यसको जोखिम बढ्ने सम्भावना रहेको भन्दै संघीय मामिला तथा सामान्य प्रशासन मन्त्रालयले सात सय ५३ वटै स्थानीय तहलाई परिपत्र गर्दै क्वारेन्टाइन आदेश, २०७७ लागू गर्न गराउन भनेकाे हाे ।

स्वास्थ्य तथा जनसङ्ख्या मन्त्रालयले विभिन्न नौ बुँदे सूचना जारी गर्दै संघीय मामिला तथा सामान्य प्रशासनलाई रोगको निगरानी चुस्त बनाउन  भनेपछि यस्तो परिपत्र गरिएको मन्त्रालयको स्थानीय तह समन्वय शाखाले जनाएको हो ।

स्थानीय तहका सवै प्रवेश बिन्दुमा हेल्थ डेस्कमा ज्वरो आएका यात्रुको मलेरियाको आरडीटी चेकजाँच तथा सम्भव भएसम्म कोभिड–१९ को आरडीटी चेकजाँचको व्यवस्था मिलाउनुका साथै चेकजाँच रिर्पोट पोजेटिभ आएकाको उपचार व्यवस्थापन स्वास्थ्य संस्था वा अस्पतालसँग समन्वय गरी स्वास्थ्य तथा जनसंख्या मन्त्रालयको मलेरिया तथा कोभिड–१९ को व्यवस्थापन सम्बन्धि निर्देशिका बमोजिम गर्न स्वास्थ्य मन्त्रालयले भनेको छ । यसका लागि अस्पताल, स्वास्थ्य संस्था तथा प्रयोगशालाको कार्यमा आवश्यक सहयोग, समन्वय र सहकार्य गर्न आग्रह गरिएको छ ।

रोगको निगराीलाई चुस्त बनाउन, कन्ट्राक्ट टे«सीङलाई बढाउन, आवश्यक पीसीआर तथा आरडीटी चेकजाँचको सुनिश्चतता गर्न पनि मन्त्रालयले भनेको छ । सबै अस्पताल र स्वास्थ्य संस्था महामारी व्यवस्थानका लागि आवश्यक तायरी अवस्थामा रहन, आफ्नो स्थानीय तहमा संक्रमणको जोखिम क्षेत्र पहिचान गरेर समुदायस्तरमा कोभिड–१९ को गरिने आरडीटी परिक्षण प्रक्रिया मापदण्ड वमोजिम गर्न र सबै निकायले जनस्वास्थ्यका मापदण्डको कडाइका साथ पालना गराउनका लागि आवश्यक प्रचारप्रसार गर्न पनि भनेको छ ।