ठूलो दलको हैसियतमा संसदीय समिति सदस्य हेरफेर गरिदिन सभामुख समक्ष एमालेको आग्रह

काठमाडौं । सर्वोच्चको फैसलापछि आफू संसदको ठूलो दल भएको भन्दै त्यसै अनुसार संसदीय समितिका सदस्यहरु हेरफेर गरिदिन नेकपा (एमाले)ले सभामुखसँग आग्रह गरेको छ।

एमाले संसदीय दलका प्रमुख सचेतक विशाल भट्टराईले सर्वोच्चको फैसालपछि एमाले र माओवादी फरक–फरक दल भइसकेको भन्दै पछिल्लो हैसियतका आधारमा सदस्य निर्धारणका लागि सभामुखसँग आग्रह गरिएको जानकारी दिए।

संसदमा प्रतिनिधित्व गर्ने राजनीतिक दलको सदस्य संख्या र समानुपातिक प्रतिनिधित्वका आधारमा संसदीय समितिमा सदस्यको मनोनयन गर्नुपर्ने व्यवस्था संविधानमा छ। सदन भित्र विधेयक निर्माण र संसदीय समितिको कार्यक्षेत्रभित्र पर्ने विषयमा निर्णय गर्दा समिति सदस्यको संख्या मह्वपूर्ण हुन्छ।

हाल राष्ट्रियसभाको अधिवेशन संचालन नभएकाले अहिले प्रतिनिधिसभाका विषयगत समितिका सदस्य मात्रै हेरफेरका लागि आग्रह गरिएको भट्टराईले बताए।

प्रतिनिधिसभामा १०,राष्ट्रियसभामा ४ र दुई संयुक्त समिति गरि हाल १६ संसदीय समिति छन्।