सरकारसँग फिल्मकर्मीका १० बुँदे माग : विदेशी मुलुकसँग सह-निर्माणदेखि फिल्म फेस्टिभलसम्म

काठमाडौं । नेपाली फिल्मकर्मीले विश्व बजारसँग प्रतिस्पर्धा गर्न सक्ने फिल्म निर्माणसहितका १० बुँदे सरकारसँग राखेका छन् ।

उनीहरुले सोमबार चलचित्र विकास बोर्डलाई ती मागपत्र पेश गरे । फिल्मकर्मीले कोभिड-१९ पछिको परिस्थितिमा नयाँ नीति बनाउन सकेमात्र फिल्म उद्योगले गति लिने भन्दै बोर्डलाई प्रस्ताव गरेका हुन् ।

उनीहरुले राज्यको सहयोगविना नेपाली फिल्मको विकास हुन नसक्ने समेत बताएका छन् । प्रस्तुत १० बुँदे मागमा नेपालले सह–निर्माणका लागि आवश्यक सन्धि गर्नुपर्ने, नेपाली फिल्म निर्माणलाई एकद्धार प्रणालीमा लैजानुपर्ने, पर्ने, अनुसन्धान तथा विकास विभाग खोल्नुपर्ने माग छन् ।

साथै, बक्सअफिस प्रणालीलाई रियल टाइमको तथ्यांक दिनुपर्ने, सरकारले आफ्नै लगानीमा अन्तर्राष्ट्रिय फिल्म महोत्सव आयोजना गर्नुपर्ने, स्टोरी बैंकको बजेट बढाउनुपर्ने, फिल्म दर्तामा विभिन्न संस्थाको अनिवार्य सिफारिस बन्द गर्नुपर्ने, सेन्सरको ग्रेडिङ प्रणाली पालना गर्नुपर्ने लगायत माग गरेका छन् ।

३४ जना फिल्ममेकरको हस्ताक्षर रहेको ज्ञापनपत्रमा छिरिङरितार शेर्पा, दीपक रौनियार, रामकृष्ण पोखरेल, मीनबहादुर भाम, अविरल थापा, प्रज्वल शमशेर जबरा, सुवर्ण थापा, प्रविण कार्की, सरोज शर्मा सापकोटा, नवनिधि दाहाल, जीतेन्द्र खतिवडा, गोविन्द पराजुली आदिले हस्ताक्षर गरेका छन् ।