सुदूरपश्चिमका पूर्व अर्थमन्त्री बोहरालाई माओवादीको २४ घण्टे स्पष्टीकरण

कैलाली । नेकपा माओवादी केन्द्रले एमालेमा गएका आफ्ना नेता झपटबहादुर बोहरालाई स्पष्टीकरण सोधेको छ ।

अछाम निर्वाचन क्षेत्र नम्बर १ (ख)बाट प्रदेश सभा सदस्यमा निर्वाचित बोहरालाई बुधवार २४ घण्टे स्पष्टीकरण सोधिएको हो ।

बोहरालाई माओवादी केन्द्र परित्याग गरेको हो भने पार्टीबाट किन निष्कासन नगर्ने भन्दै स्पष्टीकरण पेस गर्न भनिएको छ।

‘नेकपा माओवादी केन्द्र र नेकपा एमाले पार्टी पूर्ववत् अवस्थामै रहने भएपछि पनि तपाईंको राजनीतिक क्रियाकलाप नेकपा एमाले पार्टीमा देखिएको र नेकपा एमालेको केन्द्रीय समिति सदस्यसमेत नियुक्ति भएको देखिन आएकाले राजनीतिक दल सम्बन्धी ऐन २०७३ को दफा ३१ को उपदफा (१), (२) बमोजिम कार्य गर्नु भएको तथा उक्त ऐनको दफा ३२ को उपदफा १ (ख) बमोजिमको कार्य समेत गरेको बुझिन आएकोले तपाईंले पार्टी परित्याग गर्नु भएको हो भने तपाईंलाई किन पार्टी सदस्यबाट निष्कासन नगर्ने ?,’ माओवादीका सुदूरपश्चिम प्रदेश कमिटी सचिव नेपबहादुर चौधरीद्वारा सोधिएको स्पष्टीकरण पत्रमा उल्लेख छ ।

बोहरा माओवादीमा रहँदा केन्द्रीय सल्लाहकार समिति सदस्य थिए। उनी नेकपामा विवाद बढेपछि प्रधानमन्त्री केपी शर्मा ओली पक्षमा खुलेका थिए । उनले २२ पुसमा आर्थिक मामिला तथा योजना मन्त्रीबाट राजीनामा दिएका थिए ।

पछिल्लो पटक २८ फागुनमा बोहरालाई एमालेले केन्द्रीय सदस्यमा मनोतित गरेको थियो ।