प्रदेश २ः माओवादी दलको नेतामा भरत साह, प्रमुख सचेतकमा दिलिप साह चयन

जनकपुरधाम । नेकपा माओवादी केन्द्रले प्रदेश २ मा संसदीय दलका नेता, उपनेता र प्रमुख सचेतक चयन गरेको छ । दलका नेता रामचन्द्र मण्डल नेकपा एमालेमा लागेपछि भरतप्रसाद साहलाई चयन गरिएको हो ।

त्यस्तै दलको उपनेतमा सांसद जगत यादव र प्रमुख सचेतकमा दिलिप साह चुनिएको माओवादी केन्द्रले जनाएको छ ।

दलका नेता साह महोत्तरीबाट निर्वाचित भएका हुन् । यादव समानुपातिक सांसद हुन् भने प्रमुख सचेतक साह सिरहाबाट प्रत्यक्ष निर्वाचित सांसल हुन् । उनी साह यसअघि दलका उपनेता थिए ।

माओवादी केन्द्रबाट एमालेमा प्रवेश गरेका चार नेतालाई २४ घण्टाभित्र स्पष्टीकरण सोध्ने निर्णय गरिएको प्रमुख सचेतकमा चयन भएका यादवले जानकारी दिए । काठमाडौंस्थित पार्टी कार्यालयमा बसेको बैठकले यस्तो निर्णय गरिएको उनले बताए ।

संसदीय दलको नेताबाट हटाइएका मण्डल, कुन्दन साह, ज्वाला साह र मो. समिर अन्सारी माओवादी केन्द्र छाडेर एमालेमा गएका हुन् । उनीहरुलाई स्पष्टीकरण सोधिने र त्यसपछि प्रक्रिया पूरा गरी सांसदबाट हटाउने माओवादीको तयारी छ ।

प्रदेश २ मा माओवादी केन्द्रका ११ र नेकपा एमालेका २१ सांसद छन् ।