कोरोनाको दोस्रो लहरको असर अर्थतन्त्रमा पर्न नदिन सचेत छौं : अर्थमन्त्री

काठमाडौं । अर्थमन्त्री विष्णु पौडेलले कोरोनाको दोस्रो वेभले नेपालको अर्थतन्त्रमा चुनौती थप गरेकोले यसको क्षति कम गर्न नेपालले आवश्यक कदम चाल्ने बताएका छन् ।

विश्व बैंङ्कबाट आवधिकरूपमा प्रकाशन हुने नेपाल डेभलपमेन्ट अपडेटलाई सम्बोधन गर्दै अर्थमन्त्री पौडेलले पहिलो चरणमा खोप लिएकालाई दोस्रो चरणको खोप उपलव्ध गराउन सरकारले तयारी गरिरहेको र नलगाएकालाई खोप लगाउन गृहकार्य गरिरहेको पनि जानकारी दिए ।

पौडेलले ७० प्रतिशत नागरिकका लागि खोप उपलव्ध गराउनका लागि यसअघि नै विश्व बैंकले करिब ८.७ करोड अमेरिकी डलर बराबरको ऋण सहयोग गरेकोमा धन्यवाद दिए ।

कोभिड-१९ को प्रभावबाट जनताको जिविकोपार्जन रक्षा गर्न, उद्योग/व्यवसायको संरक्षण गर्न आर्थिक राहत प्याकेज ल्याएको बताए । स्रोत र साधन सीमित भए पनि वित्तीय तथा मौद्रिक उपकरणमार्फत राहत प्रदान गरिएको अर्थमन्त्री पौडेलको भनाइ छ ।

विश्व बैंकले प्रस्तुत गरेको प्रतिवेदनले ९.२ अर्ब अमेरकी डलर बराबरको निर्यात सहायता लिन सक्ने र त्यसबाट २२ लाख रोजगारी सिर्जना गर्न सक्ने प्रस्तावप्रति नेपाल सकारात्मक रहेको अर्थमन्त्री पौडेलले यसलाई अघि बढाउन सरकारको तर्फबाट आवश्यक नीतिगत तथा कानूनी पहल गर्ने प्रतिवद्धता जनाए ।

उक्त प्रतिवेदनमार्फत सुझाएका भन्सार शुल्क घटाउने, व्यापार लागत घटाउने , पर्यटन क्षेत्रको सुधार गर्ने , दीगो विकासका लक्ष्य , ग्रीन डेभलपमेन्ट र निर्यात बढाउनका लागि दिएको सुझाव यसअघि नै नीतिगत व्यवस्था गरिसकिएको पौडेलको भनाइ छ ।