‘मिस इको एसिया’को उपाधी नेपालले जित्यो, अनुश्मा रायमाझीले जितिन् टाइटल

काठमाडौंँ । मिस इको इन्टरनेशनल नेपालकी विजेता अनुश्मा रायमाझीले नेपालको वातावरण र पर्यटन क्षेत्रमा काम गर्ने इच्छा रहेको बताएकी छन् ।

नेपालमा इको टुरिजम विकासका थुप्रै सम्भावना रहेको बताउँदै उनले त्यसो गर्न सके देशलाई विदेशमा चिनाउन र आर्थिक आर्जन गर्न सजिलो हुने बताइन् ।

इजिप्टमा आयोजना भएको ‘मिस इको इन्टरनेशनल २०२१ ’ मा नेपालको प्रतिनिधित्व गरेर काठमाडौं फर्किएकी रायमाझीले प्रतियोगिताबाट ‘मिस इको एसिया’ टाइटल समेत जित्न सफल भएकी छिन् ।

प्रतियोगितामा मुख्य टाइटलपछि महत्वपूर्ण मानिएको यो उपाधि देशमा ल्याउन पाउनु महत्वपूर्ण उपलब्धी भएको उनको भनाई छ ।

राजधानीमा आयोजित प्रेसमिटमा उनले देशलाई समेत चिनाउन सफल भएको दाबी गरिन् । ‘कार्यक्रममा मैले नेपाललाई सगरमाथा, बुद्धको देशसहित बिभिन्न कला, संस्कृतिले भरिएको राष्ट्रको रुपमा चिनाएँ’ रायमाझीले भनिन्, ‘प्रतियोगिताबाट मैले धेरै देशका बारेमा सिक्न र जान्न समेत सफल भए ।’

कार्यक्रममा पूर्व मिस इको इन्टरनेशनल नेपाल तथा मिस युनिभर्स नेपाल नग्मा श्रेष्ठले रायमाझीले ‘मिस इको एसिया’ ताज नेपाललाई दिलाएर महत्वपूर्ण उपलब्धि हासिल गरेको बताइन् ।

विभिन्न ६० बढी देशका इको सुन्दरीहरुको सहभागिता रहेको प्रतियोगिता १८ मार्चदेखि ५ जुनसम्म इजिप्टमा आयोजना भएको थियो । २१ वर्षीया रायमाझीले कार्यक्रममा नेपालको सांस्कृतिक पोशाक, संस्कृति र पर्यटकीय स्थानको भिडियो प्रस्तुत गरेकी थिइन् ।