पूर्वराजा सहभागी मेलामा सयौंलाई कोरोना पुष्टि, भारतमा बिहीबार २ लाख संक्रमित

दिल्ली । भारतमा विहिबार एकैदिन झन्डै २ लाख जना मानिस कोरोनाभाइरसबाट संक्रमित भएका छन् । स्वास्थ्य मन्त्रालयका अनुसार भारतको कूल संक्रमित संख्या १ करोड ४० लाख पुगेको छ ।

विहिबार २ लाख ७३९ जना संक्रमित थपिएका हुन् । ९३ हजार ५२८ जना निको भएका छन् । १४ लाख ७१ हजार सक्रिय संक्रमित छन् । विहिबार एकैदिन भेटिएको यो संख्या महामारीयताकै सक्रिय संक्रमित संख्या हो ।

महाराष्ट्र, उत्तर प्रदेश, छत्तिसगढ, दिल्ली, मध्यप्रदेश, कर्नाटका, केरला, तामिलनाडु, गुजरात र राजस्थान सबैभन्दा बढी प्रभावित छन् । राजधानी दिल्लीमा मात्र १७,२८२ संक्रमित थपिएका छन् । संक्रमित राज्यमध्ये महाराष्ट्रमा मात्र ६३ प्रतिशत रहेको जनाइएको छ ।

पूर्वराजा सहभागी कुम्भमेलामा सयौं संक्रमित

नेपालका पूर्वराजा ज्ञानेन्द्र शाह सहभागि हरिद्धारको कुम्भमेलामा नौ बरिष्ठ सन्तसहित सयौं भक्तजनमा कोरोना संक्रमण पुष्टि भएको भारतीय संचारमाध्यमले जनाएका छन् ।

शाहले उक्त मेलामा मंगलबार गंगा नदीमै डुबेर शाहीस्नान समेत गरेका थिए । उक्त मेलामा सामाजिक दूरी पालना गर्न व्यवहारिकरुपमा कठिनाइ भएको र सयौं संक्रमित पाइएको स्थानीय प्रहरीले जनाएको छ ।

दुई दिनसम्म चलेको उक्त मेलामा ३० लाखभन्दा बढीले गंगास्नान गरेको जनाइएको छ । भारतमा भाइरसको संक्रमण ह्वात्तै बढिरहँदा गंगास्नान आयोजना गरिएको भन्दै सरकारको आलोचना भैरहेको छ ।

पूर्वराजाले स्नानपछि हरिद्वार पुगेर बाबा रामदेवलाई भेटेका थिए ।