एलिजा र लक्ष्मीले छाडेपछि ‘घिन्ताङ’मा केकी इन, बैशाख ७ देखि सुटिङ सुरु हुँदै

काठमाडौं । गतमहिना निकै हल्ला गरेर निर्माण घोषणा गरिएको फिल्म ‘घिन्ताङ’लाई मुख्य अभिनेत्रीको संकट परेको छ । अनुबन्धित भैसकेका दुई अभिनेत्री फिल्मबाट बाहिरिएका छन् । अभिनेत्री हेरफेरको श्रृंखला जारी छ र केकी अधिकारी फिल्ममा प्रवेश गरेकी छिन् ।

सुरुमा एलिजा गौतम मुख्य अभिनेत्रीको रुपमा भित्रिएकी थिइन् । मुहूर्तको एक हप्ता अगाडि उनले फिल्म छाड्ने निर्णय गरिन् । त्यसपछि फिल्ममा लक्ष्मी बर्देवाको प्रवेश भयो । तर, सुटिङमा ढिलाई भएको भन्दै उनले पनि प्रोजेक्टबाट हात झिकिन् ।

उनी बाहिरिए लगत्तै ‘घिन्ताङ’ मा अब अभिनेत्री केकी अधिकारी प्रवेश गरेकी छिन् । केकीले स्क्रिप्ट र आफ्नो भूमिका मन परेपछि फिल्म साइन गरेको बताएकी छन् । आफ्नो लगानीमा बनेको ‘बोक्सीको घर’ का लागि कपाल खौरिएकी उनले ‘घिन्ताङ’ मा नक्कली कपाल लगाउने तयारी गरेकी छिन् । बुझिएको छ ।

फिल्ममा उनले गौरव पहारीसँग अनस्क्रिन रोमान्स गर्नेछिन् । साहित्यकार मन्दिरा ‘मधुश्री’ले लेखेको ‘मासुको मूल्य’ कथामा निर्माण हुन लागेको फिल्म बैशाख ६ गतेबाट छायांकन सुरु हुने जनाइएको छ ।

एकल महिला र पुरुषबीचको अन्तरजातीय प्रेम सम्बन्ध चित्रण गर्ने फिल्ममा नीर शाह र मदनकृष्ण श्रेष्ठको पनि विशेष भूमिका हुने जनाइएको छ । ‘घिन्ताङ’ लाई दीपक श्रेष्ठले निर्देशन गर्दैछन् । सात वर्षपछि निर्देशनमा उनी कमब्याक गर्न लागेका हुन् ।