भोलिको बैठक रोकेर एकताको पहल गर्न एमाले अध्यक्षलाई अमृत बोहराको आग्रह

काठमाडौं । नेकपा एमालेको नवौं महाधिवेशनबाट निर्वाचित अनुशासन आयोगका अध्यक्ष अमृतकुमार बोहराले पार्टीलाई एकताबद्ध राख्न अध्यक्ष केपी शर्मा ओलीको ध्यानाकर्षण गराएका छन् ।

माधव नेपाल पक्षमा रहेका नेता बोहराले पार्टीलाई पुनः एकताबद्ध बनाउन एउटा पक्षमात्र सामेल भएर गरेको फागुन २८ को निर्णय अबिलम्ब फिर्ता लिन र विधिविपरीत थपघट गरिएका र हटाइएका सबै निर्णय सच्याउन आग्रह गरेका छन् ।

बोहराले आइतबार पार्टीलाई एकताबद्ध बनाउन विशेष ध्यानाकर्षण अपिल सार्वजनिक गर्दै विधानको व्यवस्था बमोजिम केन्द्रीय कमिटी, केन्द्रीय निकाय तथा मातहतका सबै कमिटीका बैठकहरू तत्काल बोलाउन आग्रह गरेका छन् ।

उनले भनेका छन्, ‘अहिलेको बिग्रिरहेको स्थितिलाई सुधार गर्न विविध उपायहरू खोजिनुपर्नेमा उल्टै वैशाख ६ गते आयोजक कमिटीको बैठक भनेर स्थितिलाई थप असहज बनाउने काम गरिँदैछ । यसलाई तकाल रोकिनुपर्छ । उत्तेजना, आवेग र अभिमान हावी भएर कुनै पनि निर्णय गर्नु हुँदैन ।’

एमाले दशौं राष्ट्रिय महाधिवेशन आयोजक कमिटीको बैठक भोलि सोमवार काठमाडौंमा बस्दैछ । सो बैठकको पूर्वसन्ध्यामा अनुशासन आयोगका अध्यक्षको तर्फबाट बोहोराले बैठक रोक्न माग गरेका हुन् ।