एन्टिजेन पोजेटिभ देखिएकी महिलाको मृत्यु

विराटनगर । एन्टिजेन पोजेटिभ देखिएकी उदयपुरकी एक महिलाको सोमबार मृत्यु भएको छ ।

उदयपुर गाईघाटकी ३५ वर्षीया जैनव खातुनको मृत्यु भएको हो। कोशी अस्पतालमा भर्ना गरेको केही समयपछि  बिहान करिब साढे ६ बजे मृत्यु भएको अस्पतालका मेडिकल सुपरिटेन्डेन्ट डाक्टर चुमनलाल दासले जानकारी दिए ।

मेसु दासका अनुसार एन्टिजेन पोजेटिभ देखिएकी खातुनको पिसिआर परिक्षण गर्न अगबै मृत्यु भएको हो । मेसु दासले अस्पतालमा ल्याउदा उनको अक्सिजनको लेभल पनि निकै कम भईसकेकाले तत्काल उपचारको तयारी गर्ने क्रममा खातुनको मृत्यु भएको बताए । खातुनमा श्वासप्रश्वासमा समस्या देखिएको थियो ।

एम्बुलेन्स चालक राजा मियाँले उदयपुरबाट विराटनगरसम्म आइपुग्दा खातुनको लागि दुई सिलिन्डर अक्सिजन सकिएको थियो ।
उनलाई विराटनगर ल्याएपनि एन्टिजेन पोजेटिभ देखिएपछि विराटनगरका ठुला अस्पतालले भर्ना गर्न नमानेको उनले बताए ।

स्वास्थ्यमा समस्या देखिएपछि आफन्तले उनलाई सोमबार बिहानको राति विराटनगर ल्याएका थिए ।
अस्पतालले एन्टिजेन परीक्षण गर्दा पोजेटिभ देखिएपछि भर्ना गर्न नमादा विराटनगरका ठुला भनिएका आधा दर्जन अस्पताल एम्बुलेन्समा राखेर एम्बुलेन्स चालक मियाँले चाहारेका थिए ।

कुनै अस्पतालले लिन नमानेपछि अन्त्यमा सोमबार विहान करिब ४ बजे कोशी अस्पताल लगिएको थियो ।