रुसी खोप ‘स्पुतनिक-भी’ले पायो नेपालमा आपतकालीन प्रयोगको अनुमति

काठमाडौं । नेपालले रुसमा विकास भएको कोभिड-१९ विरुद्धको खोप ‘स्पुतनिक-भी’लाई आपतकालिन प्रयोगको लागि अनुमति दिएको छ । औषधी व्यवस्था विभागले मंगलबार रुसी खोपलाई सर्तसहित अनुमति दिएको हो ।

गत जनवरीमा नेपालले खोप अभियान सुरु गरेपनि भारतले सर्तअनुसार खोप आपूर्ति नगर्दा अभियान प्रभावित बनेको छ ।

‘रुसी खोपलाई सर्तसहित आपतकालिन प्रयोगको अनुमति दिएका छौं’ विभागका प्रवक्ता सन्तोष केसीले भने ।

सरकारले भारतमा सिरम इन्स्टिच्युटले उत्पादन गरेको कोभिसिल्ड (अस्ट्राजेनेका) खोप, चिनियाँ कम्पनी सिनोफार्मले विकास गरेको भेरोसेल खोप र भारत बायोटेकको को-भ्याक्सलाई मात्र आपतकालिन प्रयोगका लागि अनुमति दिएको छ ।

द लान्सिट नामक एक स्वास्थ्य जर्नलमा प्रकाशित एक सोधमा रुसी खोप स्पुतनिक-भी सुरक्षित रहेको र कोभिड–१९ विरुद्ध झन्डै ९२ प्रतिशत प्रभावकारी रहेको जनाइएको छ ।

दुईदेखि आठ डिग्री सेल्सियस तापक्रममा भण्डारण गर्न सकिने रुसी खोप अत्याधिक चिसो किसिमको भण्डारण क्षमता कमजोर रहेका नेपालजस्ता देशलाई उपयोगी हुने ठानिएको छ ।

यसअघि रुसले नेपाललाई २ करोड ५० लाख डोज स्पुतनिक-भी खोप उपलब्ध गराउने समाचार प्रकाशमा आएको थियो । रुसी विदेश मन्त्रालयले नेपाललाई खोप उपलब्ध गराउने सम्झौता भएको उल्लेख गरेको थियो ।