विद्रोहीसँगको दोहोरो भिडन्तमा घाइते भएका चाडका राष्ट्रपतिको निधन
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/04/idriss-deby.jpg)
एजेन्सी । देशभित्रका विद्रोहीसँगको भिडन्तमा गत साताको अन्त्यतिर घाइते भएका अफ्रिकी मुलुक चाडका राष्ट्रपति इदरिस डेबीको उपचारका क्रममा मृत्यु भएको छ ।
आमचुनावको नतिजा आउनु एक दिनअघि उनको निधन भएकोछ । चुनावमा उनकै पार्टी विजयी हुने आंकलन गरिएको थियो । त्यसो भएको भए उनी छैटौं कार्यकाल देशको राष्ट्रपति बन्ने थिए ।
राष्ट्रपतिको निधनसँग सरकार र संसद भंग गरिएको छ । देशमा कर्फ्यू लगाइएको छ र अन्तर्राष्ट्रिय सीमानाका बन्द गरिएको छ । ६८ वर्षीय डेबीले करिव तीन दशक सत्तामा विताएका छन् । उनी अफ्रिकामै सबैभन्दा लामो समयसम्म सेवा गर्ने राजनीतिज्ञमध्येका पर्छन् ।
डेबी एक प्रशिक्षित सैनिक अधिकारी हुन् । सन् १९९० मा एक सशस्त्र विद्रोहको माध्यमबाट उनी सत्तामा आएका थिए । फ्रान्स र अन्य पश्चिमा शक्तिहरुको साथ लिएर उनी अफ्रिकाको साहेल क्षेत्रमा जिहादीको विरुद्ध लडाइँमा थिए ।
‘डेबीले युद्धको मैदानमा सार्वभौमसम्पन्न राष्ट्रको रक्षा गर्दागर्दै अन्तिम स्वास लिए,’ टेलिभिजनमार्फत सम्बोधन गर्दै चाडका सेनाप्रमुखले घोषणा गरे । उनको राजकीय सम्मानका साथ शुक्रबार अन्तिम संस्कार हुनेछ ।