नक्कली पीसीआर बोकेर विदेश उड्न लागेका ११२ यात्रु बिमानबाट फिर्ता

काठमाडौं । नक्कली पीसीआर रिपोर्ट लिएर विदेश उड्न लागेका ११२ जना यात्रुलाई त्रिभुवन अन्तर्राष्ट्रिय विमानस्थलबाट फर्काइएको छ ।

कतार, मेलेसिया, दुबईलगायतका खाडी मुलुक र भारत जान तयार भएका ती यात्रुलाई विमानबाट ओरालिएको हो । काठमाडौंको सुरिया ल्याबबाट पीसीआर गराएका ११२ जना यात्रुलाई फिर्ता गरिएको विमानस्थलका सूचना अधिकारी तेजबहादुर पौडेलले नेपाल प्रेसलाई बताए ।

पौडेलका अनुसार ल्याबमा छापा मार्दा नक्कली पीसीआर रिपोर्ट बनाएको खुलेपछि ती यात्रुलाई विमानबाट ओरालिएको हो । ९ हजार लिएर नक्कली पीसीआर रिपोर्ट बाँडिरहेको सूचनापछि मंगलबार प्रहरीले सुरिया ल्याबले छापा मारेको थियो । नक्कली रिपोर्ट तयार गरेको भेटिएपछि ल्याबका ६ जना कर्मचारीसमेत पक्राउ परेका छन् ।

शंकास्पद पीसीआर रिपोर्ट बोकेर यात्रा गर्ने बढेपछि विमानस्थलमा निगरानी बढाइएको छ ।