१० लाख मानिसको अन्धोपन हटाउन सन्दुक रुइत र बेलायती अर्बपतिले गरे सहकार्य सम्झौता

काठमाडौं । विश्वका १० लाख मानिसको मोतियाविन्दुको शल्यक्रिया गर्ने एक योजनामा तीलगंगा आँखा प्रतिष्ठानका संस्थापक डा. सन्दूक रुइत र बेलायती अर्बपति तेज कोहलीले एक सम्झौतापत्रमा हस्ताक्षर गरेका छन् ।

राजधानीमा आयोजित एक कार्यक्रममा डा. सन्दूक रुइत-तेज कोहली फाउन्डेसन घोषणा भयो । यो फाउन्डेसनले १६ भन्दा बढी मुलुकमा अन्धोपन हटाउन काम गर्ने भएको छ ।

जसमा नेपालसहित भारत, इन्डोनेसिया, म्यान्मार, बंगलादेश, उत्तर कोरिया, अफगानिस्तान, रुवान्डा, तान्जानिया, लेबनान, भुटान, इराक, घाना, इथियोपिया, कम्बोडिया, सिरिया लगायतका मुलुकमा अन्धोपन हटाउन काम गरिने भएको छ ।

बेलायती अर्बपति तेज कोहली लामो समयदेखि अन्धोपन हटाउने अभियानम सक्रिय छन् । मोतियाविन्दुबाट दृष्टिविहिन बनेका विश्वका १० लाख मानिसलाई सेवा पुर्‍याउने लक्ष्य राखिएको जनाइएको छ ।

फाउन्डेसनले सन् २०२६ भित्रै चारलाख मानिसको शल्यक्रिया गर्ने लक्ष्य लिएको छ । हाल विश्वका नौ करोड जनसंख्यालाई मोतियाविन्दुको समस्या देखिएको छ ।