बहिर्गमित जनमुक्ति सेनाको माग- ‘अयोग्य’ को बिल्ला खारेज गर, सम्मान देऊ (भिडियो)
'जनयुद्धका कमाण्डरले बेवास्ता गरे, प्रधानमन्त्रीले सम्झनुभो'
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/04/Ladaku.jpg)
काठमाडौं । बहिर्गमित जनमुक्ति सेना नेपालले आफूहरूलाई लगाइएको ‘अयोग्य’ को बिल्ला खारेज गर्दै सम्मानयुक्त शब्दसहित सम्मानपत्र र परिचयपत्र दिनुपर्ने सरकारसँग माग गरेको छ ।
चौथो राष्ट्रिय सम्मेलनको पूर्णकेन्द्रीय कमिटी बैठकको निर्णय सार्वजनिक गर्दै सो संगठनले आफूहरूलाई लगाइएको अयोग्यको बिल्ला खारेज गरी राज्यद्वारा सम्मानपत्र र परिचयपत्र वितरण गर्नुपर्ने माग राखेको हो । त्यसैगरी सरकार-माओवादीबीच भएको हतियार र सेना व्यवस्थापनको अनुगमन सम्झौता अनुरूप तत्कालीन समयका १८ वर्षमुनिका बाल सेनाहरूलाई पुन:स्थापनाका लागि आवश्यक र उपयुक्त सहयोग प्रदान गरिनुपर्ने पनि उनीहरूको माग छ ।
स्वेच्छिक अवकास लिएका जनमुक्ति सेना सरह आफूहरूलाई आर्थिक प्याकेज दिनुपर्ने, जनयुद्धका शहीदलाई राष्ट्रिय शहीद घोषणा गर्नुपर्ने, सम्पूर्ण राजनीतिक आन्दोलनका घाइतेहरूलाई औषधी उपचारसहितको दीर्घकालीन व्यवस्था गरिनुपर्ने र सम्पूर्ण बहिर्गमित जनमुक्ति सेनाका सदस्य तथा तिनका बालबालिकालाई कम्तीमा कक्षा १२ सम्म निःशुल्क शिक्षाको व्यवस्था गर्न कार्यक्रममा राजन थापाले माग गरे ।
बहिर्गमित जनमुक्ति सेना नेपालका इन्चार्ज असिम आङबुहाङ्ग लिम्बुले जनयुद्धकालका नेतृत्व तथा कमाण्डरहरूले आफूहरूलाई बेवास्ता गरेको बताए । वर्तमान प्रधानमन्त्री केपी शर्मा ओलीले भने जनमुक्ति सेना र आन्दोलनका योद्धाहरूलाई सम्झिएको उनको भनाइ छ ।
सरकारले आफूहरूसँग गरेको विभिन्न चरणको वार्ताका सहमतिहरु तत्काल कार्यान्वयन गर्न पनि माग गरिएको छ ।