हावा लाग्दा कर्णालीमा विजुली गायब, प्राधिकरणको फोन उठदैन

सुर्खेत । देशमा संघीयता आएपछि कर्णालीको विकास हुने अपेक्षामा कर्णालीवासी थिए । जहिल्यै हावा चल्दा बत्ती दुई तीन दिन गायब हुने पीडा उनीहरूका लागि नयाँ होइन ।

‘कम्तिमा प्रदेश सरकार आइसकेपछि बत्ती सहजै पाउने आशा गरेका थियौं, तर अहिलेसम्म केही प्रगति हुन सकेको छैन,’ लोडसेडिङको समस्या खेप्दै आएका वीरेन्द्रनगर–७ का विष्णुबहादुर शाही भन्छन्, ‘३३ केभिए विद्युत प्रसारण लाइनमा समस्या नआएको कहिल्यै देखिएन । सामान्य हावा चल्दा पनि विजुली जाने अवस्था छ ।’

दुई दिनअघि करिब १२ घण्टा गएको विजुली शुक्रबार साँझदेखि पुनः गएको छ । ‘ बारम्बार सुर्खेत विद्युत प्राधिकरणको कार्यालयमा फोन गरे पनि कहिल्यै उठदैन,’ वीरेन्द्रनगर–६ की रेशमा ओली भन्छिन्, ‘प्राधिकरणको ल्याण्डलाइन फोन नम्बर विजुली गएको खण्डमा चौविसै घण्टा व्यस्त राखिन्छन् । नागरिकले पाउनुपर्ने जानकारी समयमै पाउन सक्दैनन् ।’

प्राधिकरण सुर्खेतका प्रमुख टेकराज गिरीले विद्युत प्रसारण लाइन कहाँ बिग्रिएको हो अहिलेसम्म थाहा नभएको बताए । ‘बर्दिया राष्ट्रिय निकुञ्जमा कहाँ के भएको छ हामी खोजिरहेका छौं । अहिलेसम्म थाहा भएको छैन,’ उनी भन्छन्, ‘यसको दीर्घकालीन समस्या समाधानको एक मात्र उपाय १ सय ३२ केभिए प्रसारण लाइन नै हो ।’

निकुञ्जभित्र रुख ढल्दा रुख काटन नपाइने भएका कारण बारम्बार ११ केभिए प्रसारण लाइनमा समस्या देखिएको उनले बताए ।