कैलालीमा दिनैपिच्छे कोरोना संक्रमितको मृत्यु, अस्पताल खचाखच

कैलाली । कैलालीमा कोरानाका कारण दिनहुँजसो मृत्यु हुन थालेको छ । आइतबार जिल्लाको गोदावरी नगरपालिका–३ का ६२ वर्षीया एक पुरुषको कोरोना संक्रमणबाट मृत्यु भएको छ । शनिबार कञ्चनपुर भिमदत्त नगरपालिका– ४ की ५० वर्षीया महिलाको पनि कैलालीमा  मृत्यु भएको थियो ।

आइतबार मृत्यु भएका पुरुष निमोनिया र श्वासप्रश्वाससम्बन्धी समस्या वैशाख ७ गते अस्पताल भर्ना भएका सेती प्रादेशिक अस्पतालका सूचना अधिकारी दिलीप कुमार श्रेष्ठले जानकारी दिए ।

दोस्रो लहरको कोरोना फैलिएसँगै कैलालीका ५ जनाको मृत्यु भइसकेको छ । सेती प्रादेशिक अस्पतालमा मात्रै ४ जनाले ज्यान गुमाइसकेका छन् ।

अस्पताल खचाखच

अस्थायी कोरोना अस्पताल भरिएको छ । ५५ शय्याको अस्पतालका सबै बेड भरिएको सूचना अधिकारी श्रेष्ठले जानकारी दिए । ३ जना भेन्टिलेटरमा छन् । आइसियुमा ७ जना छन् भने अन्य सबैलाई उच्च निगरानीमा राखिएको छ ।

अहिले ५२ संक्रमितको उपचार भइरहेको छ । अन्य ३ जनामा पनि संक्रमण भएको हुनसक्ने शंकासहित उपचार भइरहेको छ ।