फिल्म दोखको ओएसटी ‘रातैले बुन्छ’ इन्टरनेट रिलिज (भिडियो)

काठमाडौं । फिल्म ‘दोख’को ओरजिनल साउन्ड ट्रयाक रिलिज भएको छ । अनुप बराल निर्देशित यो सोसल ड्रामा फिल्मले गीत ‘रातैले बुन्छ’ सार्वजनिक गरेको हो ।

गीतमा श्रवण मुकारुङको शब्द, पुष्प संगमको संगीत र झुमा लिम्बूको आवाज समावेश छ ।

माओवादी सशष्त्र युद्धको पृष्ठभूमिमा दुई गाउँबीचको दुश्मनीको कथा फिल्मले प्रस्तुत गर्छ । कुटपिटको कुरालाई लिएर दुई गाउँबीच द्वन्द्व बढेपछि फुटबल खेलाएर छिनोफानो गर्ने निर्णय हुन्छ । यसैबीचमा गाउँको स्कुलमा नयाँ शिक्षक आइपुग्छ । यो शिक्षकले दुई गाउँको झगडा मिलाउन मद्दत गर्छ कि झगडा चर्कन्छ ? फिल्म यसै वरपर घुम्छ ।

राजन कठेतले फिल्म लेखेका हुन् । शैलेन्द्र डी कार्कीले फिल्म खिचेका छन् । दीया मास्के, मनिष निरौला, लोकमणि सापकोटा, माओत्से गुरुङ, रोयदीप, कमल देवकोटा, सजन थापामगरको मुख्य भूमिका छ ।

फिल्मको प्रदर्शन मिति तय भैसकेको छैन ।