काठमाडौं । कोरोना महामारीको दोस्रो लहर तीब्र भएसँगै उपत्यका छाड्नेको लर्को लागेको छ ।
भोलिदेखि लागू गरिएको निषेधाज्ञाका कारण घर जानेलाई दिइएको दुई दिनको समयसीमामा थातथलो फर्किने यात्रुको भीडले बसपार्क र उपत्यकाबाट बाहिरिने मुख्य नाकाहरू भरिएका छन् ।
काठमाडौं छाड्नेमध्ये विद्यार्थी र ज्याला मजदुरी गर्ने धेरै छन् ।
उपत्यका भित्रिने नाकामा प्रहरीले बुधबार राति १२ बजेदेखि कडाइ गर्नका लागि विशेष योजना नै बनाएको छ ।
उपत्यका ट्राफिक कार्यालयका प्रवक्ता एसपी श्यामकृष्ण अधिकारीले मंगलबार रातिसम्म ५२ हजारभन्दा बढीले उपत्यका छोडेको बताएका छन् ।
बुधबारमात्रै २ लाखभन्दा बढी सर्वसाधारणले उपत्यका छाड्ने अनुमान ट्राफिक प्रहरीको छ ।
