वैकल्पिक सरकारबारे देउवाले भने- बहुमत पुग्या छैन, के गर्ने ? (भिडियो)

काठमाडौं । नेपाली कांग्रेसका सभापति शेरबहादुर देउवाले वैकल्पिक सरकार निर्माणका लागि तत्काल परिस्थिति नबनेको बताएका छन् । उनले आफूहरूसँग पर्याप्त संख्या नपुगेकोले यो विषय थाती रहेको उल्लेख गरे ।

आफ्नै निवासमा पत्रकारहरूसँग कुरा गर्दै उनले भने, ‘सरकार बनाउन त बहुमत चाहियो नि । जसपाले निर्णय गरेको छैन । हामीसँग बहुमत छैन के गर्ने ?’

पत्रकार सम्मेलनमा देउवाले कोरोनासँग सम्वन्धी विषयमा पार्टीको धारणा र विचारहरूबारे लिखित मन्तव्य पेस गरेका थिए । पत्रकारहरूले भने राजनीतिक विषयमा बढी चासो राखे । एक पत्रकारले सोधे, ‘अहिलेको सरकारले केही गर्न सकेन, तपाईंहरूको नेतृत्वमा वैकल्पिक सरकार आए यो समाधान हुन्थ्यो कि भन्ने जनताले अपेक्षा गरेका छन् । त्यो कति सम्भावना छ ?’ देउवाले झर्किँदै भने, ‘ए बाबा, हामीसँग सरकार बनाउने संख्या नै छैन । जसपाले निर्णय नगरी कसरी हुन्छ ?’

जसपासँग तपाईंको कुरा भएको छैन भन्ने पत्रकारको प्रश्नमा उनल जवाफ दिए, ‘कुरा त भइरहेको छ नि, तपाईंहरुलाई सबै कुरा किन भन्ने ?’ देउवाले एमसीसी सांसदबाट पारित हुनुपर्ने बताए । तर, यो विषयमा बाहिर आएजस्तो माओवादी अध्यक्ष प्रचण्डसँग आफ्नो कुनै सहमति नभएको उनको भनाइ थियो । ‘बाहिर आएको कुरा विल्कुल गलत हो, त्यस्तो भएको छैन,’ उनले भने ।