दाङमा पार्किङ गरिएको भारतीय कारमा तीन बालकको शव फेला

दाङ । तुलसीपुरमा पार्किङ गरी राखिएको कारभित्र तीन बालकको शव भेटिएको छ ।

तुलसीपुर उपमहानगरपालिका-६ स्वर्गद्वारी टोलमा आरजे ०१ सीसी ०८८५ नम्बरको भारतीय नम्बर प्लेटको कारमा तीन बालकको शव फेला परेको हो ।

उक्त कार चार महिनादेखि सोही स्थानमा रहेको खुलेको प्रहरीले जनाएको छ । मृत भेटिएका बालकहरूको पहिचान खुलेको छैन । यद्यपि तुलसीपुर-६ बरूवागाउँका तीन बालक वैशाख १६ गते साँझ हराएको निवेदन भने इप्रका तुलसीपुरमा परेको थियोे । ‘घटनाको प्रकृति गम्भीर देखिन्छ । गाडी र मृतक बालकबारे निहीन ढंगले अनुसन्धान थालेका छौं’, इप्रका तुलसीपुरका डीएसपी शिव सिंहले जानकारी दिए ।

प्रहरीले घटनास्थललाई नियन्त्रणमा लिएर अनुसन्धान थालेको छ । घटनाको अनुसन्धानका लागि टोली लिएर दाङ प्रहरी प्रमुख एसपी गणेश चन्द घटनास्थल लागेका छन् ।