भारतका ५ राज्यमा मतगणना सुरु, पश्चिम बंगालमा ममता बेनर्जीको पार्टीको अग्रता

एजेन्सी । भारतमा हालै विधानसभा मतदान सकिएका पाँच राज्यको ८ सय २२ सिटका लागि मतगणना सुरु भएको छ । पश्चिम बंगाल, आसाम, केरल, तामिलनाडू र पान्डीचेरीमा मतगणना भइरहेको छ ।

मतगणनाको प्रारम्भिक रुझान अनुसार नेपालसँग सीमाना जोडिएको पश्चिम बंगालमा ममत बेनर्जी नेतृत्वको पार्टी तृणमूल कांग्रेसले अग्रता लिएको छ । पश्चिम बंगालमा १ सय ४३ स्थानमा तृणमूल कांग्रेस र १ सय २२ स्थानमा भारतीय जनता पार्टी (बीजेपी)को अग्रता छ ।

तामिलनाडूमा डीएमकेको गठबन्धनले १ सय ११ स्थानमा अग्रता बनाएको छ भने एआईए डीएमके पार्टीले ९६ स्थानमा अग्रता लिँदै डीएमकेलाई पछ्याइरहेको छ ।

केरलमा सत्तारुढ लेफ्ट डेमोक्र्याटिक फ्रन्ट (एलडीएफ)ले भारी अग्रता हासिल गरेको छ । उसले ८२ स्थानमा अग्रत बनाउँदा युनाइटेड डेमोक्र्याटिक फ्रन्ट (यूडीएफ)ले ५० स्थानमा अग्रता हासिल गरेको छ ।

आसाम र पन्डीचेरीमा भारतीय जनता पार्टीको अग्रता छ । आशाममा भारतीय जनता पार्टीले ८० स्थान र भारतीय कांग्रेसले नेतृत्व गरेको युनाइटेड प्रोग्रेसिभ अलायन्स (यूपीए)ले ३६ स्थानमा अग्रता बनाएको छ । पन्डीचेरीमा भाजपाले १२ र यूपीएले ५ स्थानमा अग्रता बनाइरहेको छ ।