लुम्बिनीमा ५८३ कोभिड दरबन्दी स्वीकृत, कोषमा १० करोड थपियो

रूपन्देही । लुम्बिनी प्रदेश सरकारले कोभिडविरुद्ध स्वास्थ्य जनशक्ति थप गर्न करिव ६०० जना कोभिड विशेष दरबन्दी थप गरेको छ ।

पुनर्गठित लुम्बिनी सरकार मन्त्रिपरिषदको पहिलो बैठकले कोभिड-१९ नियन्त्रण तथा उपचार कोषमा १० करोड रुपैयाँ थप गर्ने निर्णय पनि गरेको छ ।

आर्थिक मामिला तथा योजना मन्त्रालयमार्फत १० करोड रूपैयाँ कोषमा उपलब्ध गराउने निर्णय गरेको आर्थिक मामिला तथा योजना मन्त्री बैजनाथ चौधरीले बताए ।

मन्त्री चौधरीका अनुसार बैठकले प्रदेशका ४ वटा कोभिड विशेष अस्पतालहरूको सेवा निरन्तरता र कर्मचारीहरूको करार अवधि थप गरिएको छ ।

बैठकले भैरहवास्थित भीम अस्पतालमा ७१ जना, लुम्बिनी प्रादेशिक अस्पतालको कोरोना विशेष अस्पतालमा १८९, बेलझुण्डीस्थित राप्ती प्रादेशिक कोरोना विशेष अस्पतालमा १७१ र भेरी अस्पताल नेपालगन्जमा १५२ जना गरी ५८३ जनाको अस्थायी दरबन्दी स्वीकृत गरेको मन्त्री चौधरीले बताए ।

यसअघि प्रदेश सरकारले संक्रमितको उपचार खर्च व्यहोर्ने निर्णय गरिसकेको छ ।