बेलझुन्डी कोरोना अस्पतालले भन्यो– अक्सिजन छैन, नयाँ भर्ना लिन सक्दैनौं

दाङ । कोरोना अस्पताल बेलझुन्डीले अब संक्रमितलाई भर्ना गर्न नसकिने जनाएको छ । अक्सिजन अभावका कारण भर्ना लिन नसकिएको भन्दै अस्पतालका व्यवस्थापक द्रोण वलीले सामाजिक सञ्जालमार्फत अपील गरेका हुन् ।

‘अक्सिजनको सहज र पर्याप्त नभएको हुँदा कसैले पनि बिरामी भर्नाका लागि सिफारिस र दवाव नदिनुहोला,’ उनले फेसवुकमा लेखेका छन्, ‘थप बिरामी भर्ना गर्नु भनेको उपचाररत बिरामीको ज्यानसमेत जोखिममा पार्नु हो ।’

उनका अनुसार अस्पतालमा हाल बेड संख्या १०० पुर्‍याइएको छ भने ५७ जना संक्रमितको उपचार भइरहेको छ । तर,अक्सिजनको अभाव भएकाले ४५ जनाको ज्यान जोखिममा छ ।

आवश्यकता अनुसार अक्सिजनको व्यवस्था नभएकाले थप संक्रमितलाई भर्ना गर्न नसकिने व्यवस्थापक वलीले बताएका छन् । उनले अक्सिजनको सजह व्यवस्थापनका लागि सम्पुर्ण सरोकारवाला समक्ष अपील पनि गरेका छन् ।