यस्तो छ मिस युनिभर्समा नेपाली पोशाक : महावीरको डिजाइनमा २४ क्यारेट सुनसम्म !

काठमाडौं । आउँदो साता अमेरिकामा हुन लागेको मिस युनिभर्स प्रतियोगितामा नेपालले हिमाल आरोहीको स्वरुप झल्कने पोशाक प्रस्तुत गर्ने भएको छ ।

६९ औं मिस युनिभर्समा नेपालले ‘ओडी टु माउन्टेन’ थिममा बनेको आरोही पोशाक प्रस्तुत गर्ने भनेको हो । मिस युनिभर्सकी नेपाल निर्देशक नग्मा श्रेष्ठले शुक्रबार नेपालले प्रस्तुत गर्ने अफिसियल पोशाक सार्वजनिक गरिन् ।

हिमाल आरोहीबाट प्रभावित भएर शेर्पा बख्खुले बनाइएको उक्त पोशाको डिजाइन महावीर पुनले राष्ट्रिय आविष्कार केन्द्रमा गरेका थिए । मिस युनिभर्सकी प्रतियोगिता अनिष्का शर्माको थीम र बिना घलेको कन्सेप्टमा महावीरले पोशाक तयार पारेका हुन् ।

धातु र ढुंगाको मिश्रण गरिएको हेडगियर, अक्सिजन मास्क, कलर, ग्लोब्स र बुट्हरु पोशाकमा समावेश गरिएका छन् । उक्त धातु २४ क्यारेट सुनले बनेको नग्माले जनाएकी छिन् ।

पोशाको पछिल्तिर राखिएका बौद्ध प्रार्थनाको झण्डालाई चाहिँ खुला र बन्द गर्न मिल्ने गरी मोटराइज जडान गरिएको छ । थ्रीडी बटन थिचेपछि हातले पोतिएको क्यानभाष र सगरमाथाको डिजाइन हेर्न सकिने समेत जनाइएको छ ।

मे १७ तारिखमा अमेरिकाको फ्लोरिडामा हुने प्रतियोगितामा भाग लिन अनिष्का त्यसतर्फ प्रस्थान गरिसकेकी छिन् ।