दैलेखको आठबीस नगरद्वारा अक्सिजनसहितको आइसोलेसन सेन्टर सन्चालन

सुर्खेत । दैलेखको आठबीस नगरपालिकाले कोरोना संक्रमणको बढदो खतराबाट नागरिकलाई जोगाउन अक्सिजनसहितको आइसोलेसन वार्ड सञ्चालनमा ल्याएको छ ।

‘हाम्रो पालिकामा भारतबाट आउने नागरिकको संखया उल्लेख्य छ । नयाँ भेरियन्टसहितको कोरोना संक्रमितको संख्या दिनानुदिन बढदै जाँदा अीक्सजनको आवश्यकता पर्ने भएका कारण हाललाई हामीले दश वटा ठूला अीक्सजन सिलिण्डर खरिद गरेर आइसोलेसन सेन्टर सञ्चालनमा ल्याएका छौं,’ आफैं पनि कोरोना संक्रमित भइ होम आइसोलेसनमा रहेका नगरप्रमुख खड्गराज उपाध्यायले भने, ‘नगरपालिकाले निर्माण गरेको आइसोलेसन भवनमा ३६ वटा शय्या जडान गरेका छौं । हालसम्म ७ जना कोरोना संक्रमित उपचारका लागि यहाँ भर्ना भइसक्नु भएको छ ।’

उनले शय्या भन्दा पनि अक्सिजनको समस्या भएको गुनासो गरे । ‘हामीकहाँ शय्याको समस्या छैन । सामूदायिक विद्यालय भवनलाई पनि प्रयोग गर्न सकिन्छ । मुख्य समस्या अक्सिजन कै हो’, नगरप्रमुख उपाध्याय भन्छन्, ‘अहिले दशवटा मात्रै सिलिण्डर खरिद गर्न सफल भएका छौं । संघीय सरकारबाट अक्सिजन सिलिण्डर पाउनेमा हामी आशावादी छौं ।’

उनले नगरवासीलाई सामाजिक दुरी कायम गर्न, मास्क लगाउन र सकभर घरमै बसेर नगरपालिकालाई सहयोग गर्न अपिल गरे ।

‘भारतबाट आएका हरेक व्यक्तिलाई १४ दिन होम आइसोलेसनमा बस्न हामीले अनुरोध गरेका छौं । सबैजना बसिरहनु भएको छ,’ उनले भने, ‘कोरोनाबाट जोगिन सबैको भूमिका महत्वपूर्ण हुन्छ । यसमा सबै सजग र सचेत बन्न अनुरोध गर्दछु ।’ आठबीसका ७० प्रतिशत युवा रोजगारीका लागि भारत जाने गरेका छन् ।