राजीनामा दिने कि अनुपस्थित हुने ? माधव समूहका नेता छलफलमै

काठमाडौं । सामूहिक राजीनामा दिने निर्णयप्रति एमालेको माधव नेपाल समूहका सांसदहरू नै विभाजित भएपछि स्थायी कमिटीका नेताहरू छलफलमा जुटेका छन् ।

सिंहदरबारमा बसेको सांसदहरूको बैठकमा राजीनामा दिएर पनि केपी ओलीकै सरकार निरन्तर रहने गरी राजनीति अघि बढ्यो भने के गर्ने ? भन्ने प्रश्न समेत उठेको थियो ।

केही सांसदले राजीनामा दिएर आत्मघाती बाटोमा जानुभन्दा आजको संसद बैठकमा अनुपस्थित रहेर अझै विकल्पहरु बाँकी राख्ने सुझाव दिएपछि माधव नेपाल अहिले स्थायी कमिटी सदस्यहरूसँग छलफलमा छन् ।

अध्यक्ष केपी शर्मा ओलीले छलफलका लागि आह्वान गरेको अवस्थामा राजीनामा दिँदा आफूहरूसँग कुनै विकल्प बाँकी नरहने सुझाव आएको एक सांसदले बताए । बैठकमा उपस्थित भएका समिना हुसेन र पार्वती विसुंखे राजीनामा नदिने भन्दै बाहिरिएका थिए ।

आजको बैठकमा २८ जना सांसद सहभागी भएको नेता झपट रावलले बताए ।