निजी अस्पतालले भन्यो- १५ दिनभित्र अक्सिजन प्लान्ट जडान गर्न सक्दैनौं

काठमाडौं । निजी अस्पतालले १५ दिनभित्र अक्सिजन प्लान्ट जडान गर्नू भन्ने सरकारको निर्देशन कार्यान्वयन गर्न नसकिने जनाएको छ ।

एसोसिएसन अफ प्राइभेट हेल्थ इन्स्टिच्युसन अफ नेपाल (अफिन) ले बिहीबार एक विज्ञप्ति जारी गरी खरिद सम्झौता गरेको साढे तीन महिना भन्दाअघि अक्सिजन प्लान्ट जडान गर्नै नसक्ने पनि जनाएको हो ।

अफिनका अध्यक्ष बसन्त कुमार चौधरीले जारी गरेको विज्ञप्तिमा देशभरि नै निषेधाज्ञा जारी रहेको र अन्तर्राष्ट्रिय हवाइसेवा पनि बन्द रहेका कारण द्रुत सामान ढुवानीको विकल्प नभएकोले सरकारी निर्णय लागू गर्न असम्भव रहेको उल्लेख छ ।

‘१०० शय्याको अस्पतालका लागि नेपाल सरकारको मापदण्डबमोजिमको प्लान्टको मूल्य कम्तीमा पनि २ करोड पर्छ ।’ विज्ञप्तिमा भनिएको छ, ‘सोको जडान गर्न चाहिने  पूर्वाधार निर्माण गर्न थप ५० लाख आवश्यक हुन्छ । वर्तमान परिस्थितिमा उक्त लगानी गर्न सबै अस्पतालहरू सक्षम छैनन्।’