प्रहरीद्वारा समाजिक सञ्जालमा लगाएको आरोप खण्डन

काठमाडौं । नेपाल प्रहरीले व्यक्तिगत प्रयोजनका लागि सिलिण्डरहरु लैजाने गरेको भन्ने सामाजिक सञ्जालमा लगाइएको आरोपको खण्डन गरेको छ ।

प्रहरी प्रधान कार्यालयले आज एक विज्ञप्ति जारी गरी नेपाल प्रहरी जोडेर गरिएको कपोलकल्पित आरोपमा कुनै सत्यता नभएको प्रष्ट प्रष्ट पारेको हो ।

बिहीबार एक चिकित्सकले प्रहरीले अक्सिजन सिलिण्डर जवरजस्ती लगेको भनेर सामाजिक सञ्जालमा लेखेपछि सञ्जालमा प्रहरी कदमको विरोध भएको थियो ।

‘नेपाल प्रहरी विरुद्धका केही व्यक्तिगत आवेगमा लेखिएका भनाई र सत्यरहित सूचना सामाजिक संजालमा अनर्गल प्रचारप्रति प्रहरी प्रधान कार्यालयको गम्भीर ध्यान आकृष्ट भएको छ ।’ प्रहरी नायव महानिरीक्षक प्रकाश अधिकारीद्वारा जारी विज्ञप्तिमा भनिएको छ, ‘पीडाको यस घडीमा १ जनाको ज्यान बचाउन सकिएमा पनि पुण्य हुने ठानी खटिएका प्रहरीका तमाम कर्मचारीले निर्वाह गरेको कर्तव्यपालनका सम्बन्धमा नै सर्वसाधारणलाई गलत सन्देश पुग्ने प्रकृतिका सूचना सम्प्रेषण हुनु सर्वथा अनुचित रहेको छ ।’

कोरोना महामारी नियन्त्रण र संक्रमितको उपचारार्थ नेपाल प्रहरी अहोरात्र खटीरहेको जनाउदै नेपाल प्रहरीले विभिन्न प्रयोजनमा रहेका ७ हजार भन्दा बढी अक्सिजन सिलिन्डरहरू नियन्त्रणमा लिएर देशभरका विभिन्न अस्पतालहरूलाई वितरण गरेको उल्लेख छ ।

विज्ञप्तिमा २०८ भन्दा बढी कोभिड संक्रमितको उपचार गरिरहेको उल्लेख छ ।