दोहोरो अंकले बढेको नेप्सेमा १० अर्ब माथिको कारोबार

काठमाडौं । नेपाल स्टक एक्सचेञ्ज (नेप्से) मा साताको पहिलो कारोबार दिन आइतबार ५४.२६ अंकले बढेको छ । आज दोहोरो अंकले बढेको नेप्से परिसूचक आज २७३८.३० विन्दुमा पुगेको छ । आज २.०२ प्रतिशतले बढेको नेप्सेमा आज २ करोड १३ लाख २८ हजार ८८२ कित्ताको किनबेचमा १० अर्ब ४० करोड ३८ लाख ७९ हजार रुपैयाँ बराबरको कारोबार भएको छ ।

आज कारोबारमा आएका २१४ वटा कम्पनीमध्ये ८ ओटा कम्पनीको शेयर मूल्य उच्च दरले वृद्धि भएका छन् । आज कारोबार रकम पनि अन्य दिनको तुलनामा करीब तीन अर्बले बढी भएको छ । अहिले व्यापार व्यावसायका अन्य क्षेत्र बन्द भएकाले पनि लगानीकर्ता शेयर बजारमा आकर्षित भएको लगानीकर्ता बताउँछन् ।

‘अहिले लगानीकर्ताले उच्च मनोबलसँगै लगानी गरेकाले पनि बजार बढ्नमा टेवा पुगेको हो,’ लगानीकर्ता विनोद श्रेष्ठले बताए ।

आज सबैभन्दा धेरै पुर्नबीमा कम्पनीको शेयर कारोबार भएको छ । आज पुर्नबीमाको आज ८५ करोड रुपैयाँ बराबरको कारोबार भएको छ । यसैगरी, एनसीसी बैंकको ३१ करोड रुपैयाँ बराबरको भएको छ ।

त्यस्तै, नेपाल इन्फ्रास्ट्रकचर बैंकको २९ करोड रुपैयाँ बराबरको कारोबार भएको छ । आज सबैभन्दा धेरै रु रु जलविद्युत कम्पनीका शेयर धनीले कमाएका छन् । आज रु रु जलविद्युतको शेयर मूल्य १० प्रतिशतले बढेको छ ।

यसैगरी शिखर इन्स्योरेन्स कम्पनीलगायत अन्य सात वटा कम्पनीको शेयर मूल्य ९ प्रतिशतभन्दा बढीले बढेको छ । आज सबै समूहका उप–सूचकहरु हरिया भएका छन् । आज सबैभन्दा धेरै निर्जीवन बीमा कम्पनी समूहको उप–सूचक सबैभन्दा बढी ४ दशमलव २८ प्रतिशतले बढेको छ । यसैगरी, जीवन बीमा कम्पनी समूहको उप–सूचक ३ दशमलव ०४ प्रतिशतले बढेको छ ।