लुम्बिनीमा महामारी नियन्त्रणका लागि संघीय सरकारले पठायो ४७ करोड

रुपन्देही । लुम्विनी प्रदेशमा कोभिडको महामारी नियन्त्रण र उपचारका लागि अर्थमन्त्रालयले करिव ४७ करोड ७ लाख ८५ हजार निकासा दिने भएको छ ।

द्रूत कार्ययोजनाका साथ खरिद प्रक्रिया अगाडि बढाउने गरी प्रदेशका ४ वटा अस्पतालमा अक्सिजन प्लान्ट, भेन्टिलेटर र अक्सिजन ट्यांक निर्माणका लागि ३४ करोड ६० लाख र ३ वटा अस्पतालमा एचडीयू स्थापनाका लागि १० करोड ४७ लाख ८५ हजार रुपैयाँ निकासा दिने निर्णय भएको हो ।

अर्थमन्त्रालयका अनुसार बुटवलको लुम्विनी प्रादेशिक अस्पताललाई ९ करोड ८० लाख, भेरी अस्पताल नेपालगन्जलाई १५ करोड, राप्ती स्वास्थ्य विज्ञान प्रतिष्ठान दाङलाई ६ करोड ८० लाख र भिम अस्पताल भैरहवालाई ३ करोड रकम दिन लागिएको हो ।

यस्तै एचडीयू स्थापनाका लागि लुम्विनी प्रादेशिक अस्पतालका लागि ६ करोड २५ लाख ४० हजार, तुल्सीपुर अस्पताल दाङलाई ३ करोड १२ लाख ७० हजार र पश्चिम नवलपरासीको पृथ्वीचन्द्र अस्पताललाई १ करोड ९ लाख ७५ हजार रुपैयाँ उपलब्ध गराउने निर्णय भएको हो

उक्त रकमबाट लुम्विनी प्रादेशिक अस्पतालमा २ युनिट तुल्सीपुर अस्पतालमा १ युनिट र पृथ्वी चन्द्र अस्पतालमा १० एचडीयू शय्या निर्माण हुनेछ ।

कोभिडका बिरामीहरुको उपचार गरी रहेका प्रदेशका यी अस्पतालहरुमा भेन्टिलेटर र अक्सिजनको अभाव हुँदा कोभिड संक्रमणका बिरामीहरुको ज्यान गइरहेपछि मन्त्री बिष्णु पौडेलले रकम निकासामा चासो देखाएका थिए ।

यसअघि सपथग्रहण गरेकै दिन अर्थमन्त्री पौडेलले अस्पतालहरुमा एचडीयू स्थापनाका लागि १ अर्व ३६ करोड ६५ लाख रुपैयाँ निकासा दिने निर्णय सदर गरेर पदबाहली गरेका थिए ।

योसँगै अर्थ मन्त्रालयले ४ अर्व ३१ करोड रुपैयाँ कोभिड महामारीको नियन्त्रण उपचार र अस्पतालहरुको सुधारका लागि रकम खर्च गर्ने सहमति दिएको थियो ।

अर्थमन्त्रालयले आइतवार कोभिड–१९ को नियन्त्रण र उपचारका लागि देशभरका २६ वटा केन्द्रीय अस्पताल र ९ वटा प्रादेशिक गरी ३५ वटा अस्पतालमा अक्सिजन प्लान्ट, भेन्टिलेटर र अक्सिजन ट्यांक निर्माणका लागि २ अर्व ९५ करोड २० लाख बजेट निकासा हुन लागेको हो ।