महामारीले होटलको आम्दानी घट्दै, सोल्टीको घाटा १३ करोड

काठमाडौं । कोरोनाको कहरमा परेका ठूला होटल  चल्न नपाउँदा आम्दानी पनि गुमाउँदै गएका छन् । केही दिन अघि तेस्रो त्रौमासिक (चैत मसान्त) सम्मको वित्तीय विवरण प्रकाशित गरेको र्‍याडिसन होटल र सोमबार प्रकाशित गरेको सोल्टी होटलको वित्तीय विवरणले ठूला पाँचतारे होटलको आय दिनानु दिन खस्किदैं गएको देखाएको छ ।

सोल्टी होटलले हिजो प्रकाशित गरेको वित्तीय विवरण अनुसार चालु आर्थिक वर्षको नौं महिनामा १३ करोड ६६ लाख ३८ हजार खुद नोक्सानी वेहोरेको छ ।

गत वर्ष यस अवधिमा सोल्टीको खुद नाफा १४ करोड ५ लाख ४७ हजार रुपैयाँ बराबरको थियो । यो वर्ष खुद नाफा घट्नुमा गत वर्षदेखि कोरोनाका कारण आन्तरिक र वाह्र्य पर्यटक नआउनु र ठूल–ठूला राष्ट्रिय र अन्तराष्ट्रिय ‘इभेन्ट’ नहुनु होटलले जनाएको छ ।

गत वर्ष कोरोना नेपालमा फैलिएसँगै ठूला तथा साना होटल करीब ५ महिना बन्दै भएका थिए । सोल्टीको यो वर्षको वित्तीय विवरण अनुसार यस वर्षको कुल आम्दानी ३० करोड ८७ लाख ४७ हजार रुपैयाँ बराबरको भएको छ ।

तर, खर्च ४४ करोड ४९ लाख ७४ हजार भएको होटलको वित्तीय विवरणमा उल्लेख छ । साथै तेस्रो त्रमाससम्म कम्पनीको कुल सम्पत्ति २ अर्ब १२ करोड ३० लाख ८९ हजार र कुल दाहित्व ६० करोड ९९ लाख ४२ हजार रहेको छ । साथै कम्पनीको प्रतिशेयर आम्दानी १ दशमलव ६२ ऋणत्मक रहेको छ ।

गत हप्तामात्रै वित्तीय विवरण प्रकासित गरेको होटल र्‍याडिसनको पनि घटा २१ करोड नाघेको छ । कोरोनाले धरासायी बनाएको ठूला होटलहरु अझै कति समय नखुल्ने हुन त्यो कसैलाई थाहा छैन । अर्बौ लगानी रहेका होटल क्षेत्रको वित्तीय विवरण दिनानु दिन खुम्चिदैं जानु शुभ संकेत नभएको बताउँछन् होटल व्यवसायी ।