नेपालमा कोरोनाभाइरसका थप दुई नयाँ प्रजाति भेटियो, थप सतर्क बन्न स्वास्थ्य मन्त्रालयको आग्रह

काठमाडौं । नेपालमा कोरोनाभाइरसका थप दुई नयाँ प्रजाति फैलिएको पुष्टि भएको छ ।

स्वास्थ्य तथा जनसंख्या मन्त्रालयले आज विज्ञप्ती जारी गर्दै बी-१६१७२ र बी-१६१७१ प्रजातिका दुई म्युटेन्ट भाइरस भेटिएको जनाएको हो ।

देशका विभिन्न भागबाट गत साता संकलित ३५ नमुनालाई विश्व स्वास्थ्य संगठनको समन्वयमा जिन सिक्वन्सिङ गरी आज प्राप्त नतिजाअनुसार ९७ प्रतिशतमा (३४ वटामा) बी १६१७२ र ३ प्रतिशतमा बी१६११७१ भाइरस फेला परेको हो ।

परिवर्तित दुई भाइरससँगै नेपालमा फैलिएको कोरोनाभाइरसको नयाँ प्रजाति तीन पुगेको छ । यसअघि नेपालमा युके भेरिएन्ट फैलिएको मन्त्रालयले जनाएको थियो ।

विश्व स्वास्थ्य संगठनले २०२१ मे १० मा यो नयाँ भेरिएन्टलाई विश्वव्यापी भेरिएन्ट अफ कन्सर्न भनेर घोषणा समेत गरेको छ । हाल पत्ता लागेको भाइरस सबै उमेर समूहमा धेरै संक्रामक र जोखिमपूर्ण अवस्थामा रहेको पनि मन्त्रालयले जनाएको छ ।

सरकारले विज्ञप्तीमार्फत जनस्वास्थ्यको मापदण्डलाई कडाइका साथ पालना गर्न आग्रह समेत गरेको छ ।