महिला आयोगले अनुगमन गरेको २ वटा आइसोलेसन सेन्टरकाे अवस्था सन्तोषजनक

काठमाडौं । राष्ट्रिय महिला आयोगले ललितपुर महानगरपालिकामा रहेको २ वटा आइसोलेसन सेन्टरको स्थलगत अनुगमन गरेको छ । आयोगकाे टाेलीले  जेठ ३ गते आइतबारका दिन गरेकाे २ वटा आइसोलेसन सेन्टरको अवस्था सन्ताेषजनक  रहेकाे पाइएकाे आयोगले  जनाएकाे छ ।

आयोगका अध्यक्ष कुमारी कमला पराजुलीको नेतृत्वमा आयोगका सदस्य विद्या कुमारी सिन्हा, आयोगका उप–सचिव मिरा शेरचन तथा अनुगमन तथा मुल्याङ्कन व्यवस्थापक संजय ढकालको टोलीले स्थलगत अनुगमन गरेको हो । ललितपुर महानगरपालिका–२६, सुनाकोठीमा अवस्थित नेपाल युथ फाउन्डेसनले ललितपुर महानगरपालिकासँगको सहकार्यमा कोभिड–१९ प्रभावितका लागि ५० बेड क्षमताको आइसोलेसन संचालनमा ल्याएको हो ।

यसबाट अहिलेसम्म ४९ जना पुरुष र ३१ जना महिला गरेर जम्मा ८० जनाले सेवा लिइसकेका आयोगले जारी गरेको विज्ञप्तीमा उल्लेख छ । आयोगका अनुसार अहिले १६ महिला र १५ पुरुष गरेर ३१ जम्मा जना बस्दै आएका छन् ।

केहीलाई थप उपचारका लागि विभिन्न अस्पतालमा रेफर गरिएको अनुगमनको क्रममा भेटिएको छ । आइसोलेसन सेन्टरमा आउने कोरोना संक्रमित व्यक्ति स्थानीय तह विभिन्न अस्पतालको सिफारिसबाट आउने गरेका छन् ।

यस्तै आयोगको टोलीले ललितपुर महानगरपालिका, वागडोलस्थित ज्यापु समाज जेष्ठ नागरिक आनन्द निकेतनको नवनिर्मित भवनमा ललितपुर महानगरपालिकासँगको सहकार्यमा सञ्चालनमा ल्याइएको ८० बेड क्षमताको आइसोलेसन सेन्टरको पनि अनुगमन गरेको छ । अनुगमनका क्रममा उक्त आइसोलेसन सेन्टर अपाङ्गता र जेष्ठ नागरिक मैत्रीं हिसाबले सञ्चालन गरेको पाइएको छ ।

आइसोलेसन सेन्टारबाट अहिलेसम्म ४६ जनाले सेवा लिइसकेका र अहिले पनि २४ महिला र २२ पुरुष गरेर जम्मा ४६ जना बस्दै आएका छन् । १८ जनालाई थप उपचारका लागि विभिन्न अस्पतालमा रिफर गरिएको पनि जनाइएको छ । आइसोलेसन सेन्टरलाई आवश्यक मेडिकल टिम, सुरक्षा गार्ड र अक्सिजनको ललितपुर महानगरपालिकाले प्रदान गर्दै आएको छ ।
यस्तै खाना तथा आइसोलेसन व्यवस्थापन सुन्दरढोका साथी सेवाले, आइसोलेसन संचालन गरेको भवन र अन्य आवश्यक सहयोग र एक जना जनशक्ति ज्यापु समाजले प्रदान गर्दै आएको छ । आइसोलेसन सेन्टरमा आउने कोरोना संक्रमित काठमाडौं, ललितपुर लगायत अन्य संस्थाबाट सिफारिस भै आउने गरेका छन् ।
आयोगले अन्य स्थानीय तहलाई पनि कारोना संक्रमितको सहयोग र औषधीपचारको लागि यस्तै आइसोलेसन सेन्टर सञ्चालनमा ल्याई सहयोग पुर्‍याउन पनि अपिल गरेको छ ।