म्यानमार संकट गहिरियो : आङ साङ सूचीको दल दर्ता खारेज

यांगुन । म्यानमारको जुन्ता सरकारले गठन गरेको निर्वाचन आयोगले लोकतन्त्रवादी नेतृ आङसाङ सुकीले नेतृत्व गरेको नेसनल लिग फर डेमोक्रेसी दललाई खारेज गर्ने भएको छ ।

म्यानमार नाउ समाचार एजेन्सीका अनुसार गत नोभेम्बरमा सम्पन्न चुनावमा भएको धाँधलीमा जिम्मेवार रहेको भन्दै जुन्ताप्रति बफादार आयोगले उक्त निर्णय गरेको हो ।

एनएलडीबाहेकका थुप्रै राजनीतिक दलहरुले भाग नलिएको एक कार्यक्रममा उक्त निर्णय भएको जनाइएको छ । एनएलडी दलको निर्वाचन घोषणापत्र झूठो भएको भन्दै दल दर्ता खारेज गर्नुपर्ने ठहर उक्त बैठकले गरेको समेत उल्लेख छ ।

चुनावमा धाँधली भएको भन्दै गत फेब्रुअरी १ मा म्यानमारको जुन्ता सरकारले सत्ता आफ्नो हातमा लिएको थियो । सुरक्षाकर्मीले म्यानमार हिंसामा ८०० भन्दा बढीको हत्या गरेको राष्ट्रसंघले जनाएको छ ।