एक महिनाभित्रै मनाङेको दोस्रो सपथ

पोखरा । गण्डकी प्रदेशसभामा स्वतन्त्र हैसियतमा रहेका एकमात्र सांसद राजीव गुरुङ ‘दीपक मनाङे’ ले आइतबार मन्त्रीको सपथ लिएका छन् । प्रदेश प्रमुख सीता पौडेलले उनलाई पद तथा गोपनीयताको सपथ गराएकी हुन् । महिना दिनको बीचमा उनको दोस्रो सपथ हो ।

मुख्यमन्त्री पृथ्वीसुब्बा गुरुङले यसअघि वैशाख १६ मा सोही मन्त्रालयमा नियुक्त गरेका थिए । तर, गुरुङको राजीनामासँगै वैशाख २६ बाट उनी पनि पदमुक्त भए ।

गत बुधबार पुनर्नियुक्त मन्त्रालय विस्तार गर्दै मनाङेलाई पनि मन्त्रीमा दोहोर्‍याएका थिए । सोही दिन भएको सपथ ग्रहणमा बाँकी ४ जना मन्त्रीले सपथ लिएपनि उनी कामले जिल्ला बाहिर रहेकाले आइतबार एक्लै सपथ गराइएको हो । मुख्यमन्त्रीले जेठ २९ भित्रै सदनबाट विश्वासको मत लिनुपर्नेछ ।