भारतमा भाइरस संक्रमणबाट ज्यान गुमाउनेको संख्या ३ लाख नाघ्यो, संक्रमण घटेपनि मृत्युदर घटेन

दिल्ली । भारतमा अहिलेसम्म कोरोनाभाइरस संक्रमणबाट ३ लाख भन्दा बढीले ज्यान गुमाएका छन् । त्यहाँको ग्रामिण क्षेत्रमा मृत्यु भएकाहरुको वास्तविक संख्या यो भन्दा पनि उच्च हुनसक्ने विज्ञहरुले बताएका छन् ।

कोरोना महामारीको दोस्रो लहरसँग जुधिरहेको भारत अतिप्रभावित देशको रुपमा अमेरिका पछि दास्रो स्थानमा छ । जोन्स हप्किन्स विश्वविद्यालयका विवरणअनुसार भारतमा अहिलेसम्म दुई करोड ६० लाखभन्दा धेरै मानिस सङ्क्रमित भइसकेका छन् २ करोड ३७ लाख भन्दा बढी संक्रमणमुक्त भएका छन् ।

पछिल्लो २४ घण्टामा संक्रमणको कारण ४ हजार ४ सय ५४ जनाको मृत्यु भएको छ । २ लाख २२ हजार ३ सय १५ जना नयाँ संक्रमित थपिएका छन् भने २४ घण्टामा ३ लाख २ हजार ५ सय ४४ जना डिस्चार्ज भएका छन् ।

हालसम्म ३ लाख ३ हजार ७ सय २० जनाको मृत्यु भइसकेको छ भने २७ लाख २० हजार ७ सय १६ जना सक्रिय संक्रमित छन् ।

भारतमा ‘कालो ढुसी’ को संक्रमणका बिरामी ८ हजार ८०० जनाभन्दा बढी बिरामी फेला परेकाछन् । कोभिड भएर निको भएका मानिसहरु यो रोगबाट पीडित भएको पाइएको छ ।

मृत्यु हुनेको वास्तविक संख्या भने खुल्न सकेको छैन । यहाँ पछिल्लो केहि दिनयता ‘कालो ढुसी’ को संक्रमणले संकटलाई झन् जटिल बनाएको छ ।

मृत्यु हुनेको वास्तविक संख्या थाहा भाउन भारतीय पत्रकारहरुले शवगृहमा मृत शरीरहरु गनेको केही समाचारहरुमा जनाइएको छ । यहि आधारमा भारतमा झन्डै १० लाख मानिसहरु मारिएको अनुमान गरिएको छ ।