‘एक अक्षरको गीत’ मा फुर्वाको अर्को कीर्तिमान : विश्वकै अग्लो स्थानमा प्रमाणपत्र

काठमाडौं । गायक, निर्देशक तथा सञ्चारकर्मी फुर्वा शेर्पाले सन् २००४ मा एक अक्षरको गीत सार्वजनिक गरेर विश्व कीर्तिमान राखेका थिए । गिनिज बुक अफ वर्ल्ड रेकर्डमा दर्ता भएको सो कीर्तिमानलाई हालै युकेको वर्ल्ड बुक अफ रेकर्डले पनि मान्यता दियो । अहिले फेरि यो कीर्तिमानको प्रमाणपत्र लिने क्रममा शेर्पाले अर्को रोचक कीर्तिमान राखेका छन् ।

उनले विश्वकै अग्लो स्थानमा उभिएर आफ्नो कीर्तिमानको आधिकारिक प्रमाणपत्र ग्रहण गर्दै नयाँ कीर्तिमान बनाएका हुन् । विश्वको सर्वोच्च शिखर सगरमाथाको बेस क्याम्पमा उभिएर उनले प्रमाणपत्र ग्रहण गरेका छन् ।

शेर्पाले सन् २००४ मा ‘गीत एक अक्षरको’ नामक एल्बम ल्याएका थिए । त्यसमा देवनागरी लिपिको एक अक्षर ‘म’ मात्रै प्रयोग गरिएको थियो, जसलाई संसारकै पहिलो एक अक्षरको गीतका रुपमा गिनिज बुकले मान्यता दिएको थियो । यही गीतलाई वर्ल्ड बुक अफ रेकर्डले समेत स्वीकार गरेको फुर्बाले बताएका छन् ।

यस गीतमा फुर्बाको आफ्नै स्वर र संगीत रहेको छ भने म्युजिक एरेन्ज निरज श्रेष्ठले गरेका छन् ।