वागमतीका ८ अस्पतालमा अक्सिजन प्लान्ट राख्न प्रक्रिया शुरू

हेटौंडा । वागमती प्रदेश सरकारले प्रदेश मातहतका सबै अस्पतालमा अक्सिजन प्लान्ट स्थापनाको प्रक्रिया अघि बढाएको छ ।

कोरोना महामारी र अक्सिजन अभावलाई ध्यान दिँदै सामाजिक विकास मन्त्रालयले सार्वजनिक खरिद अनुगमन कार्यालयमार्फत एक साताको सीमा राखेर मंगलबार टेण्डर आह्वान गरेको छ ।

मन्त्रालयले प्रदेश मातहतमा रहेका काठमाडैंको टोखा, ललितपुरको बज्रबाराही, दोलखाको चरिकोट, रामेछापको रामेछाप अस्पताल, काभ्रे मेथिनकोट, धादिङ अस्पताल, सिन्धुपाल्चोकको चौतारा र चितवनको बकुलहर अस्पतालमा अक्सिजन प्लान्ट स्थापना गर्न लागेको लागेको हो ।

एक महिनाभित्र प्लान्ट स्थापना गरिसक्ने गरी प्रक्रिया शुरू गरिएको सामाजिक विकास मन्त्री सरस्वती बस्नेतले बताइन् ।

प्रदेश मातहतका १३ मध्ये ६ अस्पतालमा यसअघि अक्सिजन प्लान्ट संचालनमा छ । मन्त्रालयले यसअघि १३ वटै जिल्लालाका लागि ‘एक जिल्ला एक पीसीआर मेसिन’ को निर्णय गरेको बताएको छ ।