हरिहरका पिताको निधनपछि नीताको टिप्पणी : नेताहरु कोरोनाभन्दा कुर्सीमै लिप्त भए

काठमाडौं । कोरोना कहरले पछिल्लो समय कलाकार र उनीहरुको परिवारलाई पनि पीडा दिइरहेको छ । कतिपय कलाकार संक्रमित भएर अस्पताल भर्ना भएका छन् भने, कतिपयका आफन्तले ज्यान गुमाएका छन् ।

यस्तो परिस्थितीमा उनीहरु दुःखी हुनु स्वभाविक हो । अभिनेत्री नीता ढुंगानाले आफन्त पर्नेको निधनप्रति दुःख व्यक्त गर्दै राजनीतिज्ञहरु भाइरस नियन्त्रणभन्दा पनि कूर्सीकै हानथापमा व्यस्त भएको उल्लेख गरेकी छिन् ।

विगत एक वर्षदेखि उनी युवा ज्योतिष हरिहर अधिकारीसँगको प्रेममा छिन् । हरिहर र नीताले विहेको तयारी पनि गरेका छन् । मंगलबार अधिकारीका बुवाको कोरोना संक्रमणले निधन भएको थियो ।

हरिहरका बुवासँगको फोटो सेयर गर्दै नीताले लेखेकी छिन्, ‘मेरो देश मेरो गौरव भनेर सोच्ने मान्छे म, आज म किन यो देशमा जन्मिएँ होलाजस्तो लागिरहेको छ । मेरो देशले मेरो रक्षा गर्न सक्दैन भन्ने कुरा आज आएर थाहा पाएँ । कोरोनाविरुद्ध संसार लडिरहँदा मेरो देशले मलाई झन् लात हान्छ भन्ने कुराको आज आभाष भयो ।’

समयमै आइसीयूको व्यवस्थापन भएको भए र अक्सिजन पाएको भए कसैले पनि ज्यान गुमाउन नपाउने अवस्था आउने उनले जनाएकी छिन् ।